फेरि देखियो स्वाइनफ्लु, राजधानीमा एक परिवारको सबै सदस्यमा संक्रमण
राजधानीमा एक परिबारका सबै सदस्यलाई स्वाइनफ्लु देखिएको छ । काठमाडौँ कालिमाटी निवासी एक परिवारका तीन सदस्यमा स्वाइनफ्लु देखिएको हो ।
राष्ट्रिय जनस्वास्थ्य प्रयोगशालामा परीक्षण गराउँदा एच–१ एन –१ ‘पाण्डामिक फ्लुु २००९’ देखिए पछि परिवारै उपचारका लागि टेकुस्थित सहिद शुक्रराज ट्रपिकल अस्पताल पुगेका थिए ।
टेकु अस्पतालका सरुवारोग विशेषज्ञ डा. शेरबहादुर पुनले परीक्षणका क्रममा एक परिबारका सबै सदस्यहरुमा एच–एन– देखिएको भन्दै उपचारको प्रक्रिया अघि बढेको बताए । उनले परिबारका श्रीमान् श्रीमती र विद्यालय तहमा अध्ययन गर्ने एक छोरामा एच–१,एन–१ पोजेटिभ देखिएको बताए ।
यसअघि हिजो मात्रै त्रिवि शिक्षण अस्पतालमा एक जना स्वाइनफ्लु भएका विरामीको ज्यान गएको थियो ।उता स्याङ्जाको वालिङमा संक्रमण बढेपछि स्वास्थ्य सेवा विभाग इपिडिमियोलोजी तथा रोग नियन्त्रण महाशाखाबाट टोली खटिएको छ ।
