चुनाबको मुखैमा,तीन दिनमा तीन लाखले किन राजधानी छाडे ?
काठमाडौं । १४ गते १, ५ र ७ नम्बर प्रदेशमा स्थानीय तहको निर्वाचन हुँदैछ ।दोश्रो चरणको चुनाबका लागि काठमाडौँ छोड्नेहरुको संख्या बढ्दै गएको छ ।विभिन्न जिल्लाबाट काम, अध्ययन तथा अन्य सिलसिलामा राजधानीमा बसोबास गर्दै आएका करिब तीन लाखले स्थानीय तहको निर्वाचनका लागि राजधानी छाडेका छन् ।
महानगरीय ट्राफिक प्रहरी महाशाखाका अनुसार गएको तीन दिनयता ३१ हजार सवारीसाधन काठमाडौंबाट विभिन्न जिल्लाका लागि बाहिरिएका छन् । ती सवारीसाधनमा करिब ३लाख यात्रुले काठमाडौं छाडेको प्रहरीको तथ्यांक छ । हवाई मार्गबाट पनि उत्तिकै संख्यामा यात्रुले काठमाडौं छाडेको अनुमान छ ।
ट्राफिक प्रहरीका अनुसार १० गते १० हजार ५ सय सवारी साधनमा ८६ हजार ९ सय ३३ जना यात्रु बाहिरिएका छन् । त्यसैगरी आइतबार १० हजार १ सय सवारीसाधनमा ८७ हजार ३ सय ९९ जना यात्रु बाहिरिएका छन् भने आज ९सोमबार० बिहानसम्म १० हजार ५ सय ८० सवारीसाधनमा ७३ हजार ३ सय ३५ जना यात्रु राजधानीबाट बाहिरिएका छन् ।
केही दिनयता राजधानी बाहिर जानेहरुको संख्या उल्लेख्य बढ्न थालेको ट्राफिक प्रहरी महाशाखाले जनाएको छ ।
असार १४ गते बुधबार प्रदेश नम्बर १, ५ र ७ मा स्थानीय तहको निर्वाचन हुँदैछ । ३५ जिल्लाका ३३४ स्थानीय तहमा दोस्रो चरणमा चुनाव हुन लागेको हो । यो निर्वाचनमा एक महानगर, ७ उपमहानगर, १०१ नगरपालिका, २१५ गाउँपालिकाका ६४ लाख ३२ हजार ७६५ मतदाताले भाग लिनेछन् । निर्वाचनबाट १५ हजार ३८ प्रतिनिधि निर्वाचित हुनेछन् । ८ हजार ३ सय ६४ मतदान केन्द्र कायम गरिएको छ ।
