एमाले पुनर्गठन हुन्छ : महासचिव पोखरेल
नेकपा (एमाले) का महासचिव शंकर पोखरेलले कार्यदलको सुझावको आधारमा एमाले पुनर्गठन हुने बताएका छन् । पार्टी केन्द्रीय कार्यालयमा आयोजित कार्यक्रममा बोल्दै पाेखरेलले पार्टीलाई नयाँ शिराबाट एकताबद्ध बनाएर लैजानुपर्ने बताए ।
पुनर्गठनको कार्ययोजना बनाउनकै लागि पार्टीले कार्यदल बनाएको भन्दै पोखरेलले मातहतका कमिटीको सुझावको आधारमा पार्टी पुनर्गठन हुने बताए । उनले भने, अहिले पार्टीले संस्थागत हिसाबले नै केही काम गर्न खोजेको छ । चुनावको समीक्षा गर्ने र पार्टीलाई पुनर्गठनको दिशामा कसरी अगाडि बढाउनुपर्दछ भन्ने विषयमा पार्टी पङ्क्तिको भावनाको प्रतिनिधित्व गर्दै पार्टी कार्यकर्ताहरूबाट सुझाव सङ्कलन गर्ने प्रक्रियामा छ । सुझावकै आधारमा निर्णय हुन्छ ।
पार्टी अहिलेको अवस्थामा नयाँ ढङ्गले अगाडि बढ्नुपर्दछ भन्ने मान्यताको पक्षमा कार्यकर्ताहरु रहेको उनले बताए । उनले भने, नयाँ ढङ्गले अगाडि बढ्ने कुरा स्वाभाविक हो । वैचारिक, राजनीतिक र सङ्गठनात्मक हिसाबले पार्टीलाई थप एकताबद्ध बनाउने काम गर्नुपर्छ । पार्टीलाई वैचारिक, राजनीतिक र सङ्गठनात्मक रूपमा एकताबद्ध बनाउनु नै अहिलेको आवश्यकता हो । यथास्थितिमा पार्टीलाई एकताबद्ध गर्न सम्भव छैन ।’ उनले पार्टीमा शुद्धीकरण, सुदृढीकरण र पुनर्जागरण आवश्यक रहेको बताए ।
