एमालेका कुन नेताले के जिम्मेवारी पाए ? सूचीसहित
नेकपा (एमाले) ले वर्तमान सरकार स्वेच्छाचारी तथा अधिनायकवादी बाटोमा अघि बढेको निष्कर्ष निकालेको छ । पार्टीले सचिवालय बैठकका निर्णयसहित अन्तरपार्टी निर्देशन (अपानि) सार्वजनिक गर्दै सरकारका गतिविधिप्रति गम्भीर असन्तुष्टि जनाएको हो ।
गत जेठ ४ गतेदेखि १० गतेसम्म बसेको सचिवालय बैठकका निर्णय सार्वजनिक गर्दै एमालेले सरकारका गतिविधिले लोकतान्त्रिक मूल्य, संसदीय प्रणाली तथा स्वतन्त्र सञ्चारमाध्यममाथि दबाब सिर्जना गरेको आरोप लगाएको छ ।
पार्टीले सरकार गठन भएयता संसद्लाई कमजोर बनाउने, अध्यादेशमार्फत शासन सञ्चालन गर्ने, सञ्चारमाध्यमलाई नियन्त्रण गर्ने तथा सुकुम्बासीहरूमाथि अमानवीय व्यवहार गरेको दाबी गरेको छ । यस्ता गतिविधिविरुद्ध सदन र सडक दुवैबाट विरोध अभियान सञ्चालन गर्ने निर्णयसमेत एमालेले गरेको जनाएको छ ।
एमालेले हालैको निर्वाचन परिणामको समीक्षा गर्दै पार्टी पुनर्गठनका लागि उपाध्यक्ष रामबहादुर थापाको संयोजकत्वमा कार्यदल गठन गरेको छ । पार्टी अध्यक्ष केपी शर्मा ओलीले निर्वाचन परिणामलाई गम्भीर रूपमा समीक्षा गरिएको र वैचारिक, राजनीतिक तथा संगठनात्मक रूपमा पार्टीलाई थप सुदृढ बनाउन कार्यदल गठन गरिएको जानकारी दिनुभएको छ ।
पार्टीले संगठनभित्र एकता, अनुशासन र सक्रियता अभिवृद्धि गर्दै पुनर्जागरण तथा पुनरुत्थान सम्भव रहेको निष्कर्षसमेत निकालेको छ । यस्तै, एमालेले ११औँ महाधिवेशनबाट निर्वाचित पदाधिकारीहरूको वरीयता निर्धारण गरेको जनाएको छ । वरीयताअनुसार अध्यक्षमा केपी शर्मा ओली, पहिलो उपाध्यक्षमा रामबहादुर थापा, दोस्रो उपाध्यक्षमा विष्णु पौडेल, तेस्रो उपाध्यक्षमा पृथ्वीसुब्बा गुरुङ, चौथो उपाध्यक्षमा गोकर्ण विष्ट र पाँचौँ उपाध्यक्षमा रघुजी पन्त रहनुभएको छ ।
महासचिवमा शंकर पोखरेल तथा उपमहासचिवहरूमा लेखराज भट्ट, योगेश भट्टराई र रघुवीर महासेठ रहनुभएको छ । एमालेले संगठन सुदृढीकरणका लागि देशव्यापी ‘पार्टी जागरण अभियान’ सञ्चालन गर्ने निर्णय पनि गरेको छ । अभियानअन्तर्गत केन्द्रीय नेताहरूलाई प्रदेश, जिल्ला तथा स्थानीय तहसम्म जिम्मेवारी तोकिने जनाइएको छ ।
त्यसैगरी, आगामी स्थानीय तह तथा प्रदेशसभा निर्वाचनलाई लक्षित गर्दै संगठन विस्तार र सदस्यता नवीकरण अभियानलाई तीव्र बनाइने एमालेले जनाएको छ । पार्टीले संगठित सदस्यता नवीकरणको काम जेठ मसान्तभित्र सम्पन्न गर्न मातहतका कमिटीहरूलाई निर्देशन दिएको छ । अपानिअनुसार पार्टीको प्रचार विभाग प्रमुखको जिम्मेवारी केन्द्रीय सदस्य निरज आचार्यलाई दिइएको छ भने प्रेस चौतारी नेपालको इञ्चार्जमा केन्द्रीय सदस्य रामकुमारी झाँक्रीलाई तोकिएको छ ।
