सुन्तलाको बिरुवा बेचेर पाँच लाख आम्दानी
अन्नपूर्ण गाउँपालिका–३ फगामका जोकबहादुर विकले सुन्तलाको बिरुवा बेचेर रु पाँच लाखभन्दा बढी आम्दानी गर्नुभएको छ ।
विगत पाँच वर्षदेखि नर्सरी स्थापना गरी सुन्तला, कागती लगायतका बिरुवा उत्पादन गर्दै आएका विकले असारको दोस्रो हप्तासम्म १९ हजारभन्दा बढी सुन्तलाका बिरुवा बिक्री भर्नुभएको छ ।
रघुगंगा, मालिका, मंगला र अन्नपूर्ण गाउँपालिकाका कृषि सेवा केन्द्र तथा किसानले विकको नर्सरीमै पुगेर बिरुवा खरीद गरेका हुन् । उहाँले चार हजार कागतीका बिरुवासमेत बिक्री गर्नुभएको छ । प्रतिबिरुवा रु २० देखि रु २५ सम्ममा बिक्री हुन्छ ।
“बिरुवा सबै बिक्री हुने भएकाले नर्सरीतर्फ उत्साहित छु”, उहाँले भन्नुभयो । कृषि सेवा केन्द्रमार्फत तालीम लिएर नर्सरी स्थापना गर्नुभएका विकले हरेक वर्ष बिरुवाको माग बढ्दै गएको बताउनुभयो ।
सुन्तलाको बिरुवाका लागि तनहुँ, गोर्खा र धादिङबाट समेत माग आउने गरेको छ । बिरुवा स्थानीयस्तरमै खपत भएपछि माग पूर्ति गर्न नसकिएको उहाँको भनाइ छ ।
यस्तै, फगामकै दिलमायाँ तिलिजाले समेत रु दुई लाखको सुन्तलाको बिरुवा बिक्री गर्नुभएको छ । मनसुन शुरु भएपछि यहाँका किसान सुन्तला, कागती लगायतका फलफूलका बिरुवा रोप्न व्यस्त छन्। स्थानीय तहले समेत किसानलाई अनुदानमा फलफूलका बिरुवा वितरण गरिरहेका छन् ।
प्रकाशित मिति : २१ असार २०७५, बिहिबार १५ : ४७ बजे
