पशु चौपायाको मूल्यमा कमी

भारततर्फ पशु चौपायाको निकासी ठप्प भएपछि नेपालमा पशु चौपायाको मुल्य ह्वात्तै घटेको छ ।

पशु चौपायाको आधाभन्दा बढी मूल्य घटेको पशु व्यापारीले बताएका छन् । भारतले विहार र पश्चिम बंगालमा खुला गौबधमा प्रतिबन्ध लगाएका कारण गाइ, गोरु, बाछा, बाछीको मूल्य घटेको हो । मूल्य घटेपछि पशुपालक किसान मारमा परेका छन् ।

कोनेपोखरीका पशु व्यापारी मानबहादुर पोख्रेल रु ६० हजार मूल्य पर्ने लैनो गाईको मूल्य घटेर रु ३० हजार पुगेको बताउनुहुन्छ । नेपालबाट पशु चौपाया प्रायः भन्सार छलेर भारततर्फ निकासी गरिन्छ ।

पशु क्वारेन्टाइन विराटनगरका नासु मोहम्मद मुस्तफा पशु चौपाया राति भारत बिक्रीका लागि लग्ने गरिएको बताउनुहुन्छ । अहिले बेतौना र सुनसरीको जुद्धगञ्जको सडक बाढीले भत्काएपछि चोरी निकासी रोकिएको उहाँको भनाइ छ ।

“जंगलमा लगेर छोड्नुपर्ने अवस्था आएको छ,” पशु व्यापारी जब्बरबहादुर यादवले भन्नुभयो । भारतमा बधशाला सञ्चालनको अनुमति पाएकाबाहेकले पशु चौपाया काट्न पाइदैन ।

व्यापार तथा निकासी प्रवद्र्धन केन्द्र क्षेत्रीय कार्यालय विराटनगरका अनुसार तीन वर्षयता पशु चौपायको निकासी वर्षेनी घट्दै गएको छ । कार्यालय प्रमुख कृष्ण रेग्मीका अनुसार आव २०७०÷७१ मा रु २३ करोड १८ लाख ७५ हजार बराबरको पशु चौपाया निर्यात भएकामा आव २०७१÷७२ मा रु २२ करोड ६० हजारको निर्यात भएको थियो ।

आव २०७२÷७३ मा रु २० करोड ६७ लाख ६३ हजार बराबरको पशु चौपाया निर्यात भएको थियो भने आव २०७३÷७४ को पुस मसान्तसम्ममा रु दुई करोड ८९ लाख ८४ हजारको पशु चौपाया निर्यात गरिएको छ । आव २०७३÷७४ को पुस मसान्तसम्ममा रु चार करोड ५८ लाख ३५ हजारको पशु चौपाया आयात भएको छ ।