कांग्रेसले पदाधिकारीको संख्या बढायो, वरिष्ठ उपसभापति पद थप्ने
नेपाली कांग्रेसले पदाधिकारीको संख्या बढाउने भएको छ । खुलामञ्चमा बसेको केन्द्रीय समितिको बैठकले पदाधिकारीको संख्या बढाउने प्रस्ताव निर्णयार्थ बन्द सत्रमा लैजाने निर्णय गरेको हो । बैठकले वरिष्ठ उपसभापतिको पद सिर्जना गर्ने भएको छ । उपसभापति महिलासहित ३, महामन्त्री ३ र सहमहामन्त्री १५ बनाउने निर्णय गरेको हो ।
संशोधित विधानअनुसार कांग्रेसमा अब २१ जना पदाधिकारी रहने छन् । उपसभापति अब ४ जना हुनेछन् । त्यसमा १ वरिष्ठ उपसभापति हुने छन् । उपसभापति र महामन्त्री सबै निर्वाचित हुने व्यवस्था गरिन लागिएको छ । एकजना महिला अनिवार्यसहित महामन्त्री ३ जनाको प्रस्ताव गरिएको छ । यसअघि दुईजना हुने व्यवस्था थियो । ११ जना सहमहामन्त्रीबाट ४ थपेर १५ जनाको प्रस्ताव गरिएको छ । जसमा खुला २ बाहेक अन्य समावेशी र सभापतिले मनोनीत गर्ने छन् ।
