देउवा पक्षको अधिवेशनमा जानेलाई कारबाही गर्ने कांग्रेसको चेतावनी
नेपाली कांग्रेसको १५औँ महाधिवेशन प्रक्रिया चलिरहेका बेला पार्टीको आधिकारिक प्रक्रियाबाहिर हुने गतिविधिमाथि केन्द्रीय अनुशासन समितिले कडा निगरानी र कारबाहीको चेतावनी दिएको छ । पार्टीको नाममा आधिकारिक अधिवेशन प्रक्रियाभन्दा बाहिरका गतिविधि भइरहेको भन्दै अनुशासन समितिले गम्भीर ध्यानाकर्षण भएको जनाएको हो ।
पार्टीका निवर्तमान सभापति शेरबहादुर देउवा पक्षले अघि बढाएको समानान्तर अधिवेशनलाई लक्षित गर्दै समितिले पार्टी हितविपरीत तथा अनुशासन उल्लङ्घन हुने गतिविधिमा संलग्न जोसुकैलाई कारबाहीको दायरामा ल्याउने स्पष्ट पारेको छ । अनुशासन समितिका कार्यवाहक संयोजक रमेश धमलाले पदाधिकारी, निर्वाचित प्रतिनिधि, जनप्रतिनिधि तथा क्रियाशील सदस्यसहित सबैलाई पार्टीको नीति, विधान र अनुशासनको सीमाभित्र रहेर गतिविधि गर्न निर्देशन दिएका छन् ।
पार्टीका कतिपय पदाधिकारी, नेता तथा जनप्रतिनिधिहरू नै पार्टीको नाममा हितविपरीतका गतिविधिमा संलग्न रहेको सूचना प्राप्त भएको समितिले जनाएको छ । त्यस्ता गतिविधिमाथि समितिले गम्भीरतापूर्वक निगरानी गरिरहेको धमलाले बताएका छन् । पार्टीको मर्यादा र आधिकारिक प्रक्रियाविपरीतका गतिविधि नरोकिए तत्काल अनुशासनसम्बन्धी कारबाही अघि बढाउने समितिले चेतावनी दिएको छ ।
