बम विस्फोटमा १९ जनाको मृत्यु, १२ घाइते
काठमाण्डौं । सिरियाको दमास्कसमा आइतबार भएको कार बम विस्फोटमा १९ जनाको मृत्यु भएको छ ।
सिरियाली प्रहरीले कारबम आक्रमणकारी भएको आशंकामा पिछा गरिरहेको अवस्थामा ताहरिर स्क्वायरमा प्रवेश गर्न सफल भएका एक जनाले विस्फोट गराएको बताइएको छ । अन्य दुई जनालाई भने प्रहरीले पक्राउ गरी विस्फोटक पदार्थलाई निष्क्रिय बनाएको थियो । राजधानी दमास्कसमा गत मार्चयताको यो ठूलो आक्रमण भएको बताइएको छ ।विस्फोटमा कम्तीमा पनि १२ जना घाइते भएका छन् । सरकारी टेलिभिजनले जनाएअनुसार आक्रमणकारीहरूले राजधानी दमास्कसको भीडभाड क्षेत्रलाई लक्षित गर्दै बम आक्रमण गर्ने योजनामा थिए ।
आक्रमणको अहिलेसम्म कुनै पनि समूहले जिम्मा लिएको छैन । दमास्कसमा गत मार्चमा भएको आक्रमणमा ४० जना मारिएका थिए भने त्यसको केही दिनमै अदालत भवनमा भएको विस्फोटमा ३१ जनाको मृत्यु भएको थियो । सिरियामा सन् २०११ मा सरकारविरोधी प्रदर्शनले गृहयुद्धको रूप लिएपछि अहिलेसम्म ३ लाख मानिसको मृत्यु भइसकेको छ ।
