माथिल्लो तामाकोसी नमूना आयोजना

हाम्रो इकोनोमि

काठमाडौँ । दोलखाको गौरीशंकर गाउँपालिका–१ लामाबगरमा निर्माणाधीन तामाकोसी जलविद्युत् आयोजना देशकै अत्यन्तै सस्तो र नमूना जलविद्युत् आयोजनामध्येको एक हो । यो आयोजनामा स्वदेशी पुँजी लगानी छ । यो आयोजना पूरा हुनेबित्तिकै देशको विद्युत् माग पूर्णरूपमा पूरा गर्न सकिने जलस्रोत विज्ञहरूको ठम्याइ छ ।

माथिल्लो तामाकोसीको क्षमता ४ सय ५६ मेगावाट भए पनि रोल्वालिङ खोला मिसाउँदा वार्षिक २ अर्ब ४५ करोड युनिट विद्युत् उत्पादन हुने छ यो अहिलेसम्म विद्युत् प्राधिकरणको प्रणालीमा जोडिएको कुल विद्युत्को ६० प्रतिशतभन्दा बढी हुने विद्युत् प्राधिकरणले जनाएको छ । विद्युत् प्राधिकरणको आफ्नै अग्रसरतामा निर्माणाधीन आयोजनाको गति सुस्त छ । आयोजना पूरा हुने समय र लागत दुवै दोब्बर भइरहेका छन् । तर, त्यही प्राधिकरणका कर्मचारीकै नेतृत्वमा निर्माणाधीन तामाकोसीको प्रगति उत्साहजनक छ ।