आयल निगमको कार्यकारी निर्देशकमा नागेन्द्र साह नियुक्त
नेपाल आयल निगम लिमिटेडको कार्यकारी निर्देशकमा नागेन्द्र साह नियुक्त भएका छन् । हिजो (बुधबार) बसेको मन्त्रिपरिषद् बैठकले साहलाई निगमको कार्यकारी निर्देशक नियुक्त गरेको मुख्यसचिव गोबिन्दबहादुर कार्कीले जानकारी दिए ।
साह आयल निगमको पूर्वनिमित्त कार्यकारी निर्देशक हुन् । उनी उद्योग बाणिज्य तथा आपूर्ती मन्त्रालयले आह्वान गरेको खुल्ला प्रतिस्पर्धाबाट कार्यकारी निर्देशक नियुक्तीका लागि उत्कृष्ट तीनमा परेका थिए ।
साहसँगै प्यूठानका कौशल केसी र सप्तरीका संजीवकुमार देव प्रतिस्पर्धामा थिए । यीमध्ये, अनुभव र योग्यताका आधारमा साह नै बलिया उम्मेदवार भएका कारण मन्त्रिपरिषद्ले उनलाई नै नियुक्त गरेको हो । साहको काँधमा सरकारको योजनाअनुसार ९० दिनलाई पुग्ने पेट्रोलियम पदार्थको भण्डारण गृह निर्माण गर्नुपर्ने प्रमुख चुनौती छ ।
