स्थानीयलाई मैलुङ आयोजनाको साधारण सेयर

काठमाडौँ । रसुवामा आयोजनास्थल रहेको मैलुङ खोला जलविद्युत् कम्पनीले आयोजना प्रभावित क्षेत्रबासीका लागि साधारण सेयर निष्कासन गर्ने भएको छ ।

कम्पनीले सार्वजनिक गरेको सूचना अनुसार १०० रुपैयाँ दरका तीन लाख ६८ हजार १ सय ४४ कित्ता सेयर प्रभावित क्षेत्रका नागरिकलाई बिक्री गर्न लागेको जनाएको छ ।

कम्पनीले रसुवाको मैलुङ खोलामा पाँच मेगावाटको जलविद्युत् आयोजना निर्माण गरेको छ । आयोजनाले २०७१ सालदेखि व्यावसायिक उत्पादन सुरु गरे पनि ‘गोरखा भूकम्प’का कारण क्षति पुगेपछि उत्पादन रोकिएको थियो । पुनःमर्मत सम्भार गरेर गत भदौदेखि पुनःउत्पादन सुरु भएको छ ।

कम्पनीको चुक्ता पुँजी ३६ करोड ८१ लाख ४३ हजार छ । त्यसमा प्रवद्र्धकको ७० प्रतिशत हिस्सा छ । बाँकी २० प्रतिशत सर्वसाधारण र १० प्रतिशत प्रभावित क्षेत्रका बासिन्दालाई प्रदान गर्न लागिएको हो ।

सेयर भर्न चाहनेले रसुवास्थित जनता बैंक धुन्चे, प्रभु बैंक स्याफ्रुबँेसी, आइसिएफसी फाइनान्स कालिकास्थान, हिमालयन बैंक बेत्रावती र मैलुङ खोला जलविद्युत् कम्पनीको कार्यालय डाँडागाउँमा सेयर आवेदन दिन सकिने जनाइएको छ ।