काठमाण्डौं । वर्षा सुरु हुन लागेपछि राष्ट्रिय पुनर्निर्माण प्राधिकरणले क्षतिग्रस्त भवन सिंहदरबारलाई प्लाष्टिकले ढाक्ने काम मंगलबारदेखि सुरु गरेको छ ।
वर्षात् सुरु भईसक्दा मात्रै राष्ट्रिय पुनर्निर्माण प्राधिकरणले क्षतिग्रस्त सिंहदरबारको मुख्य भवनको पश्चिम मोहडालाई प्लाष्टिकले ढाक्ने काम सुरु गरेको हो । झण्डै ३४ हजार स्क्वायर फिट क्षेत्रफल भएको सिंहरदरबारको क्षतिग्रस्त भवन भित्र पानी छिर्न नदिन ठेकेदारमार्फत प्लाष्टिकले ढाक्ने काम सुरु गरिएको छ । प्राधिकरणले साँढे ५ लाख रुपैयाँमा सिंहदरबारको मुख्य भवनमा प्लाष्टिकले ढाक्न ठेक्का दिएको हो ।
भूकम्पले क्षतिग्रस्त भवनमा थप क्षति हुनबाट जोगाउन प्लाष्टिकले ढाक्ने काम सुरु गरिएको प्राधिकरणका सहसचिव प्रकाश थापाले बताए । क्षतिग्रस्त भवनमा प्लाष्टिकले ढाक्ने काम भने दुई हप्ता भित्र सक्ने दावी गरिएको छ ।
सिंहदरबारको मुख्य भवनको संरचना नबिग्रने गरी पुनर्निर्माण गर्ने योजना बनाएपनि त्यसको कार्यान्वयनको काम भने अझै सुरु हुन सकेको छैन ।
