काठमाडौँ । नेपाली काँग्रेसले स्थानीय तहको दोस्रो चरणको निर्वाचनका लागि प्रदेश नं २ बाहेक सबै प्रदेशमा उम्मेदवार चयन गरेको छ । लगातार चलेको केन्द्रीय कार्यसम्पादन समितिको बैठकले उम्मेदवार चयन गरेको हो ।
विराटनगर महानगरपालिकाको प्रमुखमा भीम पराजुली र उपप्रमुखमा ईन्दिरा कार्की उम्मेदवार भएका छन् । दाङको घोराही उपमहानगरपालिकाको प्रमुखमा भूपबहादुर डाँगी र उपप्रमुखमा सुष्मा श्रेष्ठ तथा तुलसीपुर उपमहानगरपालिकाको प्रमुखमा गेहेन्द्र गिरी र उपप्रमुखमा देविका नेपाली रेग्मीलाई काँग्रेसले उम्मेदवार बनाएको छ ।
प्रधानमन्त्री एवम् काँग्रेस सभापति शेरबहादुर देउवाको अध्यक्षतामा बसेको बैठकले मोरङ र दाङका अन्य नगरपालिका र गाउँपालिकाको पनि उम्मेदवार चयन गरेको छ । प्रदेश नम्बर २का उम्मेदवार भने बिहीबार टुंगो लाग्ने बताइएको छ ।
