हरेक दिन नुहाउनु स्वास्थयका लागि राम्रो हुँदैन,यस्तो छ कारण
अहिले अनेक खालका अध्यन अनुसन्धानहरु बाहिर आउँने गर्छन । सामान्यतया हरेक दिन नुहाउने कुरालाई राम्रो मान्ने गरिएको छ । हामीले दिनदिनै नुहाउनु ठीक हुन्छ कि अलिअलि मैलो बसेकै ठीक हुन्छ ? केही अनुसन्धानकर्ताहरूका अनुसार हामीले शरीरको प्राकृतिक गन्धलाई बचाइराख्नुपर्छ ।
अनि हालसालै गरिएका अध्ययनहरूले धेरै नुहाउँदाखेरी शरीरका सूक्ष्म जीवाणुहरूलाई हानि पुग्ने देखाएका छन् । ब्राजिलमा रहेको घना अमेजोन जंगलमा बस्ने यानोमामी जातिका मानिसहरूको शरीरमा थुप्रो जीवाणु फेला परेको बताइएको छ । यानोमामीहरू खासै नुहाउँदैनन्, त्यसैले उनीहरूको शरीरमा जीवाणु थुप्रिएका हुन् ।
ननुहाउँदैमा उनीहरू बिरामी परेका छैनन्, गाउँमा दुर दराजमा बस्ने नेपालीहरुले पनि सामान्यतया नुहाउने काम कम मात्रामा गर्छन । विकसित देशका केही मानिसहरू पनि आजकल पूरै नुहाउन छोडेका छन् । सुप्रसिद्ध अमेरिकी विश्वविद्यालय एमआईटीबाट स्नातक उत्तीर्ण गरेका ड्यान ह्विटलकले १२ वर्षदेखि ननुहाएको दाबी गरेपछि सबै चकित भएका छन् ।
यसको साटो उनले आफैंले आविष्कार गरेको एउटा झोल छर्किने गर्छन् । मदर डर्ट प्लस मिस्ट नामक यो झोलमा मानव काखीमा पाइने राम्रो ब्याक्टेरिया रहेको अनि यसले पर्याप्त सफाइ गर्ने उनी बताउँछन् । उनको कम्पनीले प्रयोगकर्ताहरूलाई पूरै नुहाउन छोड्नुभन्दा नियमित हात धुन तर साबुन नदल्न सल्लाह दिने गरेको छ । ह्विटलकले बनाएको झोलले हाम्रो पसिनामा रहेको अम्मोनियालाई समाप्त पार्दछ ।
यसले सफाइ गर्ने, दुर्गन्ध हटाउने र रोगप्रतिरोधात्मक क्षमता बढाउने कम्पनीको दाबी छ । साबुनको आविष्कार हुनुअघि मानिसहरू कसरी आफूलाई सफा राख्थे भन्ने थाहा पाउन पनि आफूले नुहाउन छोडेको ह्विटलकले बताए । परम्परागत स्नानको साटो वा त्यस सँगसँगै यो झोलले शरीरमा जीवाणुहरूको अदृश्य साम्राज्य बनाउँछ र सफा गर्छ ।
