यस्ता निर्दयी बाबु, बीमा रकम पाउन छोरीकै हत्या
राैतहटमा एक बाबुले आफ्नै ४ वर्षीया छाेरीको हत्या गरेका छन् । रौतहटको मौलापुर नगरपालिका–६, पथरा बुधरामका रामकिशोर राय यादवले ४ वर्षीया छोरी लक्ष्मीकुमारी यादवको असार १६ गते हत्या गरेका हुन् । सुतिरहेकै अवस्थामा हराएकी लक्ष्मीको शव भोलिपल्ट बिहान गाँउकै एक पोखरीमा भेटिएको थियो ।
राम किशोरको गतिविधि शंकास्पद लागेपछि प्रहरीले उनलाई नियन्त्रणमा लिएको थियो । जीवन बीमा कम्पनीबाट पाउने रकमको लोभमा छोरीको हत्या गरेको उनले स्वीकार गरिसकेका छन् ।
यादवले गरुडाको प्रभु लाइफ इन्सुरेन्स कम्पनीमा गएको जेठ १९ गते छोरीको २५ लाखको जीवन बीमा गराएका थिए । हत्या गर्ने र बीमाको रकम निकाल्ने योजना अनुरुप नै छोरीको बीमा गराएको अनुसन्धानबाट खुलेको प्रहरीले जनाएको छ ।
बीमा बापतको पहिलो किस्ता करिब पौने २ लाख उनले बैंकलाई बुझाइसकेका थिए । बीमा गराएको २९ औं दिनमा हत्या गरेको बुझिएको छ । बीमा गरेको एक महिनाभित्र बिमित व्यक्तिको मृत्यु भएमा दोब्बर रकम भुक्तानी पाउने कुरा सुनेकाले यसो गरेको उनको बयान दिएका छन् ।
जिल्ला प्रहरी कार्यालय रौतहटमा शुक्रबार आयोजित पत्रकार सम्मेलनमा रौतहट प्रहरीका डिएसपी तथा प्रवक्ता नविन कार्कीले बिमाको रकम हात पार्नको लागि नवालिक छोरीको निर्ममतापूर्वक हत्या गरेको बताए । राति आमासँगै सुतिरहेकी छोरीलाई बोकेर लगेको र नाक मुख थुनेर हत्या गरी पोखरीमा फालेको यादवले स्वीकारेका छन् ।
नाबालिका लक्ष्मीको शव फेला परेपछि प्रहरी अनुसन्धान गर्दै जाँदा रामकिशोरले विमाको ठूलो रकम हात पर्न आफनै कान्छी छोरीको निर्ममतापूर्वक हत्या गरिएको रहस्य खुलेको थियो ।
यादवलाई मुलुकी अपराध संहिता, २०७४ को ज्यानसम्बन्धी कसुरअन्तर्गत मुद्दा दर्ता गरी जिल्ला अदालत गौरबाट ५ दिनको म्याद थप गरिएको प्रहरीले जनाएको छ ।
