चितवनमा अन्तर्राष्ट्रिय क्रिकेट रंगशाला बनाउन सहयोगको ओइरो, खुत्रुके महाअभियान आजदेखि सुरु
धुर्मुस–सुन्तली फाउण्डेसनले चितवनमा निर्माण गर्ने ‘गौतम बुद्ध अन्तराष्ट्रिय क्रिकेट रंगशाला’ निर्माणका लागि प्रदेश २ बाट पहिलो चरणमा करिब २२ लाख ४० हजार संकलन भएको छ ।
नेपाल होटल तथा पर्यटन व्यवसायी महासंघ प्रदेश २ को संयोजनमा रंगशाला निर्माणको लागि महोत्तरीको बर्दिबासमा घोषणा गरिएको खुत्रुके अभियानमा सो रकम संकलन भएको हो ।
फाउण्डेशनका अध्यक्ष सिताराम कट्टेल ‘धुर्मुस’ को उपस्थितिमा नेपाल होटल तथा पर्यटन व्यवसायी महासंघका पदाधिकारीहरुले २२ लाख ४० हजार ५०० रुपैंयाँ सहयोग हस्तान्तरण गरेका हुन् ।
रंगशाला निर्माण अभियानका लागि चितवन पुगेका धुर्मुस सहयोग संकलन अभियानका लागि बर्दिवास आएका थिए ।
सहयोग हस्तान्तरण कार्यक्रममा नेपाल होटल तथा पर्यटन व्यवसायी महासंघ प्रदेश २ को संयोजनमा खुत्रुके महाअभियान समेत सुरु भएको छ ।
सिताराम कट्टेल (धुर्मुस) ले आफ्नो तर्फबाट एक हजार रुपैंयाँ खुत्रुकेमा खसालेर खत्रुके अभियानको सुरुवात गरेका थिए ।
कार्यक्रममा सहभागी उद्योगी, व्यवसायी, उद्यमी, समाजसेवीहरुले रंगशाला निर्माणको लागि लाखौं रुपैंयाँ सहयोग गरेका थिए ।
कार्यक्रममा धुर्मुसले खेलले नेपालको अन्तर्राष्ट्रिय पहिचान बनाउन सकिन हुनाले रंगशाला निर्माणमा सहयोग गर्न चाहने सबैलाई अपिल गरे ।
‘सहयोगी मनहरुबाट सहयोग संकलन गरेरै चार वटा बस्ती बनायौं, ‘कार्यक्रममा धुर्मुसले भने’ अन्तिम पटक सहयोग गर्न आग्रह गर्दैछु रंगशाला बनाउन ।
देशमा आशाको दियो बाल्न अघि बढेको भन्दै दियोमा तेल तपाईँहरु मिलेर थपिदिनुस् ।’
एकीकृत नमुना मुसहर बस्तीका अध्यक्ष विल्टु मुसहर र उनका भाइ मञ्जले पाँच\पाँच हजार सहयोग गरेका छन् ।
सहयोग संकलन गरेर बस्ती निर्माण गरिदिएका धुर्मुस सुन्तलीलाई धन्यवाद दिँदै नेपाली सन्तती र नेपाललाई खेलकूदबाट अन्तर्राष्ट्रियस्तरमा पहिचान बनाउनेले दिनको १०० रुपैंयाँ बचत गरेर रंगशाला निर्माण गर्न सहयोग गरेका थिए ।
नेपाल होटल तथा पर्यटन व्यवसायी महासंघ प्रदेश २ का अध्यक्ष हीरा गौतमले प्रदेश २ का आठ वटै जिल्लामा सञ्चालित होटलहरु रंगशाला निर्माणको लागि सहयोगार्थ खुत्रुके अभियानकै रुपमा खुत्रुके राखिने बताए ।
