अब चावहिलमा धूलो र हिलोबाट मुक्ति मिल्दै, चावहिल-साँखु सडक यसरी हुँदैछ कालोपत्रे
हिउँदमा धूलो र बर्खामा हिलोको समस्या चावहिल–साँखु सडकको नियमित समस्या हो । तर, अब यो समस्याबाट सर्वसाधरणले मुक्ति पाउने भएका छन् ।
चार वर्षपछि बल्ला चावहिल–साँखु सडकको कालोपत्रे गर्ने कार्य अगाडि बढेको छ । अहिले यो सडक खण्ड अन्तर्गत चावहिल–बौद्धखण्डको कालोपत्रेको काम धमाधम भइरहेको छ । चावहिलबाट टुसालसम्म करिव ६ सय मिटर सडक कालोपत्रे गरिएको छ ।
बाँकी खण्डमा पनि कालोपत्रे गर्न लागिएको छ । चार वर्षअघि काठमाडौं उपत्यका सडक विस्तार आयोजना अन्तर्गत यो सडक निर्माण तथा विस्तारको काम शुरु भएको थियो ।
आयोजनाका सिनियर डिभिजनल इन्जिनियर (सिडिई) विश्वविजयलाल श्रेष्ठका अनुसार केही खण्डमा कालोपत्रे भइरहेको र ४र५ वटा स्थानमा केही दिनभित्रै कालोपत्रे शुरु गर्ने तयारी छ । उनका अनुसार जोरपाटी ओरालोबाट नारायणटारको पुलसम्म करिब ९ सय मिटर कालोपत्रे गर्नका लागि तयारी अवस्थामा छ ।
‘यहि हप्ताभित्र कालोपत्रे गर्ने लक्ष्य राखिएको छ,’ श्रेष्ठले भने ‘उक्त खण्डमा कालोपत्रे हुदै गर्दा बौद्धदेखि जोरपाटीसम्म कालोपत्रे गर्नका लागि तयार गरिने छ । मूलपानीस्थित अन्तराष्ट्रिय क्रिकेट स्टेडियमबाट थलीसम्म करिव डेढ किलोमिटर कालोपत्रे गर्नका लागि ग्राभेल, सव वेश, वेश राखेर तयार पारिएको छ ।‘
उनका अनुसार थली, इन्द्रायणी, ब्रह्मखेल लगायतका स्थानहरुमा पनि कालोपत्रे गर्ने तयारी शुरु गरिएको छ । करिव १२ किलोमिटर लम्वाईको यो सडक अधिकांश खण्डमा ग्राभेलस्तरको भैसकेको छ । श्रेष्ठले ४ किलोमिटरमा भने ग्राभेल गर्न बाँकी रहेको जानकारी दिँदै केही स्थानमा बाहेक ह्युम पाइप राख्ने, फुटपाथ बनाउने, ढल मर्मत र व्यवस्थापन लगायतका काम भइरहेको बताए ।
