ओम डेभलपमेन्ट बैंकको २ लाख ५२ हजार कित्ता सेयर लिलामीमा, पुष ९ गतेसम्म आवेदन दिन सकिने
ओम डेभलपमेन्ट बैंकले लिलामीमा राखेको २ लाख ५२ हजार ६ सय ६९ कित्ता सेयरको लागि आवेदन खुलेको छ । बैंकले निष्कासन गरेको हकप्रदमा अवितरित सेयर लिलामीमा ल्याएको हो । उक्त सेयरका लागि पुष ९ गतेसम्म आवेदन दिन सकिनेछ ।
बैंकले हकप्रदमा बिक्री नभएको संस्थापकतर्फको ४६ हजार ८२ कित्ता र सर्वसाधारण समूहतर्फको २ लाख ६ हजार ५ सय ८७ कित्ता सेयरको लिलामी खुलाएको हो ।
इच्छुक लगानीकर्ता व्यक्ति वा संघसंस्थाले न्यूनतम १०० रुपैयाँ मूल्य राखी साधारणतर्फको न्यूनतम १०० कित्ता तथा संस्थापक तर्फको सेयरको लागि न्यूनतम एक हजार कित्ताका लागि आवेदन दिन सक्ने बताइएको छ ।
बैंकको सेयर बिक्री प्रबन्धक एनआइबिएल क्यापिटल रहेको छ । बिक्री प्रबन्धकको काठमाण्डौ लाजिम्पाटस्थित मुख्य कार्यालय, ललितपुरको लगनखेलस्थित शाखा कार्यालय, ओम डेभलपमेन्ट बैंक लिमीटेडका पोखरास्थित केन्द्रीय कार्यालय र बुटवलस्थित शाखा कार्यालय, नेपाल इन्भेष्टमेन्ट बैंकका विराटनगर, सुर्खेत, वीरगञ्ज, नेपालगञ्ज र धनगढीस्थित शाखा कार्यालयबाट शिलबन्दी बोलपत्र पेश गर्न सक्नेछन् ।
बैंकको दोश्रो बजारमा प्रतिकित्ता अन्तिम बिक्री मूल्य २६० रुपैयाँ रहेको छ ।
