भरतपुर महानगरपालिकाको निर्वाचनको विषयमा सर्वोच्चमा जाँदा आफू पराजित भएको मेयरका उम्मेदवार देवी ज्ञवालीले बताएका छन । नेकपा एमाले चितवनले सर्वोच्चमा जानु नै गल्ती भएको ठहर गरेको छ । र त्यसैलाई हारको कारक पनि मानेको छ।
एमाले चितवनले आयोजना गरेको पत्रकार सम्मेलनमा बोल्दै ज्ञवालीले निर्वाचन आयोगले गरेको पुनः मतदानको निर्णय नमान्दा पराजित भएको उनले बताए । वडा नम्बर १९ को मतगणना चलिरहँदा मतगणनाको क्रममा मतपत्र च्यातिएपछि निर्वाचन आयोगले पुन मतदानको निर्णय गरेको थियो ।
एमालेले त्यो निर्णयकोविरुद्ध पुनः मतगणनाको माग गर्दै सर्वोच्चमा रिट हालेको थियो । सर्वोच्चको निर्णयमा ढिलाई हुँदा यो अवधिमा विपक्षीले तयारीको समय पाएकाले हार भएको ज्ञवालीले बताए । ‘लम्ब्याउने कुरा उहाँहरुको सेटिङ रहेछ’ ज्ञवालीले भने, ‘यो बीचमा उहाँहरुले चलखेल गर्ने मौका पाउनुभयो ’
उनले आयोगको निर्णय मानेर सोझै चुनावमा गएको भए आफूले चुनाव जित्ने दावी गरे ।
एमाले चितवनले राज्य सत्ताको दुरुपयोग गरेर आफ्ना उम्मेदवार हराएको आरोप लगाएको छ ।
आफूहरुले निर्वाचन जित्ने भएपछि आर्थिक प्रलोभनमा पारेर षड्यन्त्र गरेको एमाले चितवनको आरोप छ । लोकतान्त्रिक प्रतिस्पर्धामा हारजित हुनु स्वभाविक भएपनि सत्तागठबन्धनले सत्ताको दुरुपयोग गरेर प्रमुख पदमा एमालेका उम्मेदवारलदाई पराजित गरेको एमाले चितवनको आरोप छ ।
भरतपुर महानगरपालिका वडा नम्बर १९ को पछिल्लो मतमपरिणाम स्वभाविक मान्न नसकिने एमाले जिल्ला अध्यक्ष कृष्णभक्त पोखरेलले बताए । पैसा खर्च गरेर जितेको उनले आरोप लगाए । भरतपुरका वडामा विजयी भएका आफ्ना जनप्रतिनिधिले जनताको मन जित्नेगरी काम गर्ने एमाले चितवनको भनाई छ । एमालेबाट निर्वाचित जनप्रतिनिधिले आज सपथ लिदैँ छन् । मत पत्र च्यात्ने संगै सपथ नलिने भन्दै आज सपथ लिने भएका हुन्,अरुको हिजै सपथ भएको छ।
