चितवन । नारायणगढ–मुग्लिन सडक खण्डको इच्छाकामना–६ तीनकिलोमा पहिरोमा पुरिएर प्रहरी भ्यान र एउटा ट्रक बगेको छ । घटनामा दुई प्रहरीको मृत्यु भएको छ भने दुई प्रहरी बेपत्ता छन् ।
बिहीबार राति ९ः३० बजेतिर खसेको पहिरोले प्रहरी भ्यान र ट्रक बगाएको हो । असई निश्चल तामाङ र प्रहरी जवान चालक निश्चल कुमार मास्केको मृत्यु भएको र प्रहरी जवान सन्दिप कार्की र लिलबहादुर चेपाङ बेपत्ता रहेको जिल्ला प्रहरी कार्यालय चितवनले जानकारी दिएको छ ।
घाइते ट्रक चालक रामकुमार लामा र सहचालक सिजन लामाको उद्धारपछि आँबुखैरेनीमा उपचार भइरहेको चितवनका एसपी दीपक थापाले बताए । बिहीबार दिउँसोदेखि नै खसेको पहिरो पन्छाउन इलाका प्रहरी कार्यालय मुग्लिनबाट खटिएको थियो । प्रहरीको टोली पहिरो पन्छाएर फर्किने क्रममा खसेकै पहिरोमा पुरिएको हो । ना १ झ १३९० नम्बर को भ्यान र ना ५ ख ७८२७ नम्बरको ट्रक पहिरोमा परेको हो । यातायात खुलाउने प्रयास जारी छ ।
