ओली निवास गुण्डुमा ढले जगन्नाथ थपलिया
बागमती प्रदेशका एमाले संसदीय दलका नेता जगन्नाथ थपलिया हिजो राति अध्यक्ष केपी शर्मा ओलीको गुण्डुस्थित निवासभित्रै बेहोस भएर ढलेका छन् । उनलाई राति नै अस्पताल पुर्याइएको थियो । ओलीले प्रदेशका सांसदहरूलाई नयाँ सरकार गठनका विषयमा छलफलका लागि गुण्डु बोलाएका थिए । सचिव महेश बस्नेत पनि सहभागी वैठक बेलुकी ७ बजेदेखि झण्डै १ बजेसम्म चलेको थियो । बैठक तनावपूर्ण रहेको स्रोतले बताएको छ ।
बोल्दाबोल्दै अचेत भएका थपलियालाई सांसदहरू केशव पोखरेल, दावा दोर्जे लामा लगायतले मध्यपुर ठिमी अस्पताल ल्याएका थिए । यसपछि पनि गुन्डुको छलफल चलिरह्यो ।
स्रोतका अनुसार यत्रो दिन बितिसक्दासम्म सरकार बनाउन नसकेको, प्रदेशमा प्रभावकारी भूमिका नखेलेको जस्ता आरोप सांसदहरुले थपलियामाथि लगाए । ओलीले पनि उनलाई दपेटेका थिए । यही क्रममा तनाव बढ्दै जाँदा थपलिया ढलेर बेहोस भएको वैठकमा सहभागीले बताएका छन् । एक सांसदका अनुसार थपलिया ढलेपछि पनि ओलीले रुखो व्यवहार देखाएका थिए ।
आफ्नै पार्टीमा छलफल गर्न नसक्नेले सरकार चलाउन के सक्लान्’ भन्दै उनले छिटो उठाएर लैजान निर्देशन दिएको ती सांसदको भनाइ छ । जेएनलाई त्यहाँ पानी छम्किएर होसमा ल्याइएको थियो । त्यसपछि राति नै मध्यपुर थिमी अस्पताल भर्ना गरियो । उनको सुगर लेभल र प्रेसर बढेको पाइएको र अस्पतालले केही औषधि चलाएर डिस्चार्ज गरेको बताइएको छ । ‘वैठकमा अध्यक्षज्यूले अपमानजनक ढंगले बोल्न थाल्नुभयो । जेएन कमरेडले केहीबेर प्रतिवाद गरेपछि अचानक ढल्नुभयो’ स्रोतले भन्यो ।
