बागमतीमा राप्रपा सांसदलाई दुई थरी निर्देशन
राष्ट्रिय प्रजातन्त्र पार्टी (राप्रपा) को बागमती प्रदेश संसदीय दलमा विवाद थप चर्किएको छ । मुख्यमन्त्री किरण थापाले प्रदेशसभाबाट सोमबार लिने विश्वासको मतलाई लिएर राप्रपाका दुई समूहले आ-आफ्ना प्रदेश सभा सदस्यलाई फरक-फरक निर्देशनसहित ह्विप जारी गरेका छन् ।
यसअघि आइतबार राप्रपा बागमती प्रदेश सभाकी प्रमुख सचेतक कुमारी तामाङले मुख्यमन्त्री थापाको विपक्षमा मतदान गर्न ह्विप जारी गरेकी थिइन् । उक्त ह्विप प्रदेश सभाका राप्रपा सांसदहरूलाई पठाइएको थियो । सोही विषयमा आइतबार नै राप्रपा संसदीय दलको प्रमुख सचेतकका रूपमा डम्बर तामाङको नामबाट अर्को ह्विप जारी भएको छ ।
डम्बर तामाङले जारी गरेको पत्रमा प्रदेश सभाको बैठकमा अनिवार्य सहभागी भई मुख्यमन्त्री थापाले पेस गर्ने विश्वासको मतको प्रस्तावको पक्षमा मतदान गर्न निर्देशन दिइएको उल्लेख छ । पत्रमा उक्त ह्विप दलको बैठकको निर्णय तथा राप्रपा संसदीय दलको विधानअनुसार जारी गरिएको दाबी गरिएको छ । राप्रपा संसदीय दलका नेता उद्धव थापाले तामाङलाई सरकार गठन हुनु अगावै प्रमुख सचेतकबाट हटाएका थिए ।
यससँगै बागमती प्रदेश सभामा राप्रपाका सांसदहरूलाई एउटै विषयमा दुई समूहबाट विपरीत निर्देशन पुगेको छ । एक समूहले मुख्यमन्त्रीको विश्वासको मतको विपक्षमा मतदान गर्न भनेको छ भने अर्को समूहले विश्वासको मतको पक्षमा मतदान गर्न ह्विप जारी गरेपछि अन्यौलता सिर्जना भएको छ ।
राप्रपा बागमती प्रदेश संसदीय दलमा यसअघि नै मुख्यमन्त्री थापालाई समर्थन गर्ने विषयमा विवाद देखिएको थियो । प्रदेश संसदीय दलको निर्णयअनुसार मुख्यमन्त्रीलाई समर्थन गरिएको दाबी एक पक्षले गर्दै आएको छ भने राप्रपा केन्द्रीय नेतृत्वले उक्त समर्थन पार्टीको निर्णयविपरीत भएको बताउँदै आएको छ ।
यही विवादका कारण प्रदेश सभामा राप्रपाको आधिकारिक संसदीय दलको निर्णय र ह्विप कसको मान्य हुने भन्ने प्रश्नसमेत थप पेचिलो बनेको छ । मुख्यमन्त्री थापाले प्रदेश सभाबाट विश्वासको मत लिन लागेका बेला राप्रपाभित्र देखिएको दुई थरी ह्विपले प्रदेश सरकारको पक्षमा र विपक्षमा रहने सांसदहरूको समीकरणलाई थप अन्योलपूर्ण बनाएको छ ।
