नबिल बैंकले सेयरधनीलाई १५.८०% लाभांश र ५% बोनस सेयर दिने
नबिल बैंक लिमिटेडका सेयरधनीले आर्थिक वर्ष २०८२/८३ को मुनाफाबाट १५.८० प्रतिशत लाभांश पाउने भएका छन् । बैंकको ४२औँ वार्षिक साधारणसभाले ५ प्रतिशत बोनस सेयर र १०.८० प्रतिशत नगद लाभांश वितरण गर्ने प्रस्ताव पारित गरेको हो ।
काठमाडौंको भद्रकालीस्थित त्रिभुवन आर्मी अफिसर्स क्लबमा बिहीबार सम्पन्न साधारणसभाले उक्त लाभांश वितरणसम्बन्धी प्रस्ताव अनुमोदन गरेको हो । बैंकको हाल कायम चुक्ता पुँजी करिब २७ अर्ब ५ करोड रुपैयाँका आधारमा प्रस्तावित लाभांशमध्ये ५ प्रतिशत बोनस सेयरको रकम करिब १ अर्ब ३५ करोड रुपैयाँ रहेको छ । यस्तै, १०.८० प्रतिशत नगद लाभांशका लागि करसहित करिब २ अर्ब ९२ करोड रुपैयाँ बराबरको रकम छुट्याइएको थियो ।
साधारणसभाले बैंकको ८ प्रतिशत अविमोच्य असञ्चिति अग्राधिकार सेयरधनीलाई ८ प्रतिशत नगद लाभांश वितरण गर्ने प्रस्तावसमेत पारित गर्ने एजेन्डा राखेको थियो। साथै, आर्थिक वर्ष २०८२/८३ को वार्षिक तथा वित्तीय प्रतिवेदन अनुमोदन, आगामी आर्थिक वर्षका लागि लेखापरीक्षक नियुक्तिलगायतका प्रस्ताव पनि सभामा समेटिएका थिए ।
यसैगरी, बैंकको अधिकृत पुँजी वृद्धि, प्रबन्धपत्र तथा नियमावली संशोधन तथा सम्भावित मर्जर तथा एक्विजिसनसम्बन्धी कार्यका लागि सञ्चालक समितिलाई अख्तियारी दिने प्रस्ताव पनि साधारणसभाका एजेन्डामा थिए । नबिल बैंकले आर्थिक वर्ष २०८२/८३ को वितरणयोग्य मुनाफाबाट उक्त लाभांश दिने निर्णय गरेको थियो । सञ्चालक समितिको ७१२औँ बैठकले सुरुमा १५.८० प्रतिशत लाभांश प्रस्ताव गरेको थियो, जसलाई साधारणसभाबाट अनुमोदन गर्ने प्रक्रिया अघि बढाइएको थियो ।
