नारायणीको पुलमुनि अड्किएको क्रुज सिप हटाउने तयारी
नारायणी नदीको पुल मुनि अड्किएको राइनो क्रुज सिप हटाउने तयारी आज बिहानबाट पुन: सुरु गरिएको छ । सुरक्षित हिसाबले निकाल्ने गरी प्राविधिक तयारी गरिएको छ । प्राविधिकहरूसँग सल्लाह गरी सबै तयारी गरेका छौं । पुलको पिल्लरलाई कम भन्दा कम क्षति हुने गरी निकाल्ने तयारी भइरहेको छ, चितवन प्रमुख जिल्ला अधिकारी गणेश अर्यालले भने ।
क्रुजसिप निकाल्नका लागि क्रेनसमेत प्रयोग गरिने छ । क्रेन क्रुजसिप अड्किएको ठाउँ नजिकसम्म पुग्नका लागि हिजो राति अबेरसम्म दुईवटा एक्स्काभेटरमार्फत् बाटो बनाइएको थियो । आज पनि प्रमुख जिल्ला अधिकारी, सडक डिभिजन कार्यालय भरतपुरका प्रमुखसहित इन्जिनियरहरूको टोली पनि काममा खटिएको थियो ।
