देउवा पक्षका सबै केन्द्रीय सदस्यलाई कांग्रेस बैठकमा निम्तो
नेपाली कांग्रेसको १४औँ महाधिवेशनबाट निर्वाचित कार्यसमितिमा रहेका केन्द्रीय सदस्यहरू सानेपा जाने भएका छन् । विशेष महाधिवेशनबाट आएको गगन थापा नेतृत्वको कार्यसमितिको बैठकले समायोजनको निर्णय गरेपछि नेताहरू सानेपा जान तयार भएका हुन् । कांग्रेसको केन्द्रीय कार्यसम्पादन समितिको बैठकले विशेष महाधिवेशनबाट बाहिर रहेकाहरूलाई पनि समायोजन हुन आह्वान गरिसकेको छ । आह्वानपछि देउवानिकटका नेताहरू बैठकमा जान लागेका हुन् । तत्कालीन कार्यवाहक सभापति पूर्णबहादुर खड्कानिकटका नेता पनि सानेपा जाने तयारीमा छन् ।
कांग्रेसको केन्द्रीय समिति बैठक आज दिउँसो सानेपामा बस्दै छ । कांग्रेसको भोलिबाट १५ औँ महाधिवेशन प्रक्रिया सुरू हुँदैछ । खड्का निकट नेताहरू सानेपा गएपनि खड्का भने आफैँले सर्वोच्चमा दायर गरेको रिट विचाराधीन भएकाले नजाने भएका छन् । आज आफूहरू सानेपा बैठकमा जानेबारे छलफल भइरहेको नेता रामहरि खतिवडाले बताए ।
उनले भने पार्टीमा समायोजन भनेपछि हामी जान तयार भएका हौँ । रुख र चार तारे झन्डा जहाँ हुन्छ, हामी त्यही हुन्छौँ । महाधिवेशन प्रक्रियामा पनि भाग लिन्छौँ । खतिवडासहित डिना उपाध्याय, श्याम घिमिरे, सुरेन्द्र पाण्डे, मीनबहादुर विश्वकर्मा, नैनसिंह महर, जीवनबहादुर शाही, गोविन्द भट्टराईलगायत छन् । यसअघि यो समूहले सामूहिक रूपमा पार्टी एकताको अपिल गरेको थियो । आज विशेष महाधिवेशनबाट बाहिर रहेका ४० भन्दा बढी केन्द्रीय सानेपा जाने दाबी गरिएको छ ।
