रास्वपाले अख्तियारलाई कार्यकर्ता भर्ती केन्द्र बनाउन खोजेको ज्ञानेन्द्र शाहीको आरोप
राप्रपा संसदीय दलका नेता ज्ञानेन्द्र शाहीले अख्तियारमाथि प्रश्नैप्रश्न गरेका छन् । राज्यव्यवस्था सुशासन समितिको बैठकमा बोल्दै ठूला नेताहरू जोडिएका भ्रष्टाचारको मुद्दा अघि नबढाएको भन्दै अख्तियारको भूमिकामाथि प्रश्न उठाए । उनले अख्तियार अनुसन्धान आयोगले माओवादीको लडाकु शिविर, गिरिबन्धु टी इस्टेट प्रकरण, तारागाउँ जग्गा शेयर प्रकरण, नेपाल आयल निगमको जग्गा खरिद प्रकरण, ओम्नी घोटाला र एनसेल काण्डको मुद्दा किन अघि नबढाएको भन्दै प्रश्न गरे ।
उनले १८२ सीट जितेर आएको रास्वपा सरकारले पनि सुशासनको पक्षका काम गर्न नसकेको आरोप लगाए । उनले पहिलाका कांग्रेस–एमालेले अख्तियारमा पार्टीका कार्यकर्ता भर्ती गरेजसरी अहिले रास्वपाले पनि गर्न खोजेको बताए । उनले संवैधानिक परिषद्मा पार्टीका कार्यकर्ता भएकाले नियुक्ति प्रक्रियामा परिवर्तन गर्नको लागि संविधान संशोधन गर्न चाहे सरकारलाई साथ दिने बताए ।
उनले भने अख्तियार अनुसन्धान आयोगका आयुक्त र प्रमुख आयुक्त हुने व्यवस्था संवैधानिक परिषद्बाट होइन कि खुला प्रतिस्पर्धाबाट आउने व्यवस्था गरौँ न । त्यसपछि काम हुन्छ कि हुँदैन ? यो एउटा परिवर्तन गरौँ । सत्तापक्षले कुरा गर्नुभन्दा ड्राफ्ट बनाएर लिएर आउनुस्, हामी संसद्मा दुई–तिहाइ बहुमतका साथ यसलाई पारित गरिदिन्छौँ । उनले मन्त्रिपरिषद्का निर्णयमा अख्तियार नलाग्ने व्यवस्था हटाउन पनि माग गरे ।
