कांग्रेस देउवा समूहको राष्ट्रिय भेला सुरु
नेपाली कांग्रेसको संस्थापन इतर समूहको राष्ट्रिय भेला सुरु भएको छ । राष्ट्रिय भेला आयोजक समितिका संयोजक डा शशांक कोइरालाको अध्यक्षतामा सुरु भएको हो । भेलामा गत माघमा सम्पन्न कांग्रेसको विशेष महाधिवेशनको विपक्षमा रहेका देउवा तथा डा शशांक कोइराला समूहका नेता-कार्यकर्ताको उपस्थिति छ । भेला मिराकल पार्टी प्यालेस काठमाडौंमा भएको हो ।
भेलालाई हिजोमात्रै काठमाडौं आइपुगेका निवर्तमान सभापति शेरबहादुर देउवाले सम्बोधन गर्नेछन् । जेनजी आन्दोलनको क्रममा गम्भीर घाइते भएका उनी उपचारका लागि सिंगापुर गएका थिए । उनी पाँच महिनापछि हिजो नेपाल फर्किएका हुन् । उनको स्वागतमा उनकै समूहका नेता कार्यकर्ताहरू त्रिभुवन अन्तर्राष्ट्रिय विमानस्थल पुगेका थिए । त्यहाँबाट बाजागाजासहित चुनदेवीमा रहेको यो समूहको सम्पर्क कार्यालयमा पुर्याइयो । त्यहाँ उनले सम्बोधनसमेत गरे । बन्दसत्र साउन ३० र ३१ गते हुने जनाइएको छ ।
