देउवालाई भव्य स्वागतको तयारी, ७ हजार नेता–कार्यकर्ता एयरपोर्ट जाने
करिब ५ महिनापछि स्वदेश फर्किन लागेका नेपाली कांग्रेसका पूर्वसभापति शेरबहादुर देउवाको भव्य स्वागतको तयारी गरिएको छ । राष्ट्रिय भेला आयोजक समितिका संयोजक डा.शशांक कोइरालाको नेतृत्वमा स्वागतको तयारी भइरहेको नेता मीन विश्वकर्माले बताए । देउवा २८ गते दिउँसो त्रिभुवन अन्तर्राष्ट्रिय विमानस्थल उत्रिनेछन् । उनले भने, हामीले स्वागत गर्न पाउनुपर्छ भनेर नै उहाँलाई दिउँसो आउने गरी मिलाइएको हो । संयोजककै नेतृत्वमा पार्टीका शीर्ष नेताहरू स्वागतमा जानुहुन्छ । उनले देउवाको स्वागतमा करिब ५ देखि ७ हजार नेता कार्यकर्ता एयरपोर्टमा उपस्थित हुने अनुमान गरेको बताए ।
उनले थपे, हामी छलफलमा छौँ । आज पनि भेला आयोजक समितिको बैठक बस्दै छ । समय बाँकी नै छ । हामीले उहाँको स्वागतमा करिब ५ देखि ७ हजार नेता कार्यकर्ता उपस्थित हुने अनुमान गरेका छौँ । ८२ फागुन १३ गते सिंगापुर उडेका देउवा राष्ट्रिय भेलाको छेको पारेर काठमाडौं फर्किन लागेका हुन् । आधिकारिकता विवादमा सर्वोच्च अदालतबाट निस्सा पाएपछि यो समूह हौसिएको छ । देउवा समूह भेलाको तयारीमा केन्द्रित हुँदा संस्थापन पक्ष भने महाधिवेशनको तयारीमा जुटेको छ । थप निर्णयको लागि दुई दिनदेखि केन्द्रीय समिति बैठक जारी छ ।
