मुख्यमन्त्री फेर्ने मेरो निजी चाहना होइन : शेरधन राई
नेकपा (एमाले) का सचिव एवं कोशी प्रदेश इन्चार्ज शेरधन राईले कोशी प्रदेश सरकार सञ्चालनका सन्दर्भमा केन्द्रबाट भएको सहमति र पार्टी अध्यक्षको निर्देशनलाई अक्षरशस् कार्यान्वयन गरिने बताएका छन् । पछिल्लो समय कोशी प्रदेश सरकार र पार्टीभित्र देखिएका विवादका बारेमा उनले सामाजिक सञ्जालमार्फत आफ्नो धारणा सार्वनजिक गरेका हुन् ।
कोशीमा हिक्मत कार्की नेतृत्वको सरकारलाई विस्थापित गर्न राई अतिरिक्त सक्रिय रहेको आरोप लाग्दै आएको छ । राईले भने यसलाई अफवाहको संज्ञा दिएका छन् । गएको साउन ९ गते एमाले र नेकपाबीच प्रदेश सरकार सञ्चालन र नेतृत्वका सवालमा भएको तीनबुँदे सहमतिलाई कार्यान्वयन गर्नु दुवै पार्टीको अनिवार्य कर्तव्य भएको राईको भनाइ छ । उक्त सहमति कार्यान्वयनका लागि पार्टी अध्यक्ष केपी शर्मा ओलीले आफू (इन्चार्ज), प्रदेश कमिटी र मुख्यमन्त्रीलाई स्पष्ट निर्देशन दिएको उनले बताएका छन् ।
नेता राईले सहमति कार्यान्वयन गर्ने क्रममा केही प्राविधिक वा आन्तरिक गाँठो परेको कुरा स्वीकारेका छन् । सहमति कार्यान्वयन गर्ने कुरामा केही गाँठो परेको साँचो हो, तर त्यो बाहिर ल्याउने विषय थिएन उनले लेखेका छन्, मुख्यमन्त्रीज्यू आफैँले अध्यक्षलाई भेटेर गाँठो फुकाउने जिम्मा लिन्छु भन्नुभएको हो र हिजोको भेट र निर्देशनपछि उहाँले त्यो गाँठो फुकाउनुहुनेछ भन्ने पार्टीको अपेक्षा छ । अध्यक्ष ओलीले इन्चार्ज र प्रदेश पदाधिकारीलाई छलफलका लागि गुण्डु बोलाएको भन्ने चर्चालाई भने उनले खण्डन गरेका छन् । अन्य कामले काठमाडौँ गएका बेला अध्यक्षसँग भेट भएको र त्यहाँ मुख्यमन्त्रीको उपस्थितिमा सााक्षी बसेर कुरा भएको उन स्पष्टोक्ति छ ।
मुख्यमन्त्री फेर्ने कुरा प्रदेश इन्चार्जको निजी चाहना भएको र आफूले हस्ताक्षर अभियान चलाएको भन्ने चर्चालाई राईले वाहियात हल्ला र सफेद झूट भनेका छन् । मुख्यमन्त्री फेर्ने कुरा मेरो निजी चाहना हो भन्नु गैरजिम्मेवार कुरा हो, उनले लेखेका छन्, मैले पार्टीको नीति, विधि र पद्धतिको उल्लंघन गर्न जानेको छैन र व्यक्तिगत स्वार्थमा रमाउन पनि सिकेको छैन । आफू कोशी प्रदेशको संस्थापक मुख्यमन्त्री हुँदा पार्टी नेतृत्वको निर्देशन पाउने बित्तिकै तत्कालै पद हस्तान्तरण गरेको उनले स्मरण गराएका छन् । ‘पार्टीले अर्को नेतालाई हस्तान्तरण गर्नुस् भन्ने बित्तिकै मैले हाँसीखुसी जिम्मेवारी सुम्पेको थिएँ, म इमान र निष्ठाको राजनीतिमा विश्वास गर्छु, उनले भनेका छन् ।
