खोलाले बगाएर खोटाङमा २ जनाको मृत्यु
भारी वर्षापछिको बाढीपहिरोले कोशी प्रदेशका विभिन्न जिल्लामा धनजनको क्षति भएको छ । जिल्ला प्रहरी कार्यालय खोटाङका अनुसार दिक्तेल रुपाकोट मझुवागढी नगरपालिका(६ नेर्पाकी ४३ वर्षीया शान्ता राई र केपिलासगढी गाउँपालिका ४ बाक्सिलाका ७१ वर्षीय पर्शुराम परियारको खोलाले बगाएर ज्यान गएको छ । आफन्तको घरबाट फर्किने क्रममा स्थानीय छाँगे खोलामा आएको बाढीले बगाउँदा शान्ता राई बेपत्ता भएकी थिइन् । ढिलोसम्म घर नफर्किएपछि आफन्त र स्थानीयले खोजी गर्दा उनको शव खोलामा फेला परेको हो ।
यस्तै, गाइखुरे खोल्सीमा आएको बाढीले बगाउँदा पर्शुराम परियारको मृत्यु भएको प्रहरी निरीक्षक निराजन बस्नेतले जानकारी दिए । त्यस्तै अधिकांश सडक अवरुद्ध छन् । इलामको रजदुवाली खण्डमा पहिरो झरेपछि मेची राजमार्ग अवरुद्व भएको छ । धनकुटा, खोटाङ, पाँचथर र इलामका मुख्य र सहयक सडक अवरुद्ध भएका छन् ।
कतिपय ठाउँमा प्रहरी प्रशासनले सवारी सञ्चालनमा रात्रिकालीन रोक लगाएको छ । जिल्ला प्रशासन कार्यालय धनकुटाले भेडेटार–रवि–राँके सडक खण्ड, तमोर करिडोरअन्तर्गत मुलघाटदेखि पाँचथर सिमाना तथा भेडेटारबाट तेह्रथुम, संखुवासभा, भोजपुर र पाँचथरतर्फ जाने सम्पूर्ण सवारी साधन सञ्चालनमा रोक लगाएको छ । यस्तै, खोटाङ जिल्ला प्रशासन कार्यालयले मध्यपहाडी लोकमार्गअन्तर्गत चखेवा–दिक्तेल–जयरामघाट सडक र जिल्लाका सहायक सडकहरूमा आपतकालीन सवारीबाहेक अन्य सबै सवारीसाधन सञ्चालनमा रोक लगाएको छ ।
