अहिले प्रदेश सरकार फेरबदलको समय होइन : योगेश भट्टराई
नेकपा एमालेका उपमहासचिव योगेश भट्टराईले कार्यकालको अन्तिम समयमा प्रदेश सरकार फेरबदल उचित नभएको बताएका छन् । एमाले-कांग्रेस तिक्तताले प्रदेश सरकार फेरबदल प्रक्रिया अघि बढेपछि उनले यसले अस्थिरता र सत्ता लोलुपता प्रकट गरेको उनको भनाइ छ । भट्टराईले भनेका छन्, कार्यकालको अन्तिमतिर रहेका प्रदेश सरकारहरूको फेरबदल उचित होइन । किन, कसले र केका लागि यो गरिरहेको छ ? यसको खोजीनीति हुनु पर्दछ । यसले अस्थिरता र सत्ता लोलुपतालाई नै प्रकट गरेको छ ।
विगतका सम्झौता कार्यान्वयन गर्न आनाकानी गरेको भन्दै कांग्रेसले साथ छाडेपछि एमाले सबै प्रदेशमा सत्ताबाहिर हुने अवस्थामा पुगेको छ । उनले यो परिस्थितिबारे छलफल गर्न पार्टीको बैठक बस्नुपर्ने बताएका छन् । उनले थपेका छन्, हिजो जनस्तरमा पुराना दल र पुरानो नेतृत्वको बारेमा जे जे टिप्पणी भएका थिए आजका कामरकारबाहीले त्यही धारणालाई बल पुर्याइरहेका छन् । यस्तो परिस्थितिमा पार्टीको बैठक बसेर सामूहिक निष्कर्षका साथ अघि बढ्नु पर्ने हो तर पारा उही पुरानै छ ।
