शाही निरंकुशतासँग नझुकेको प्रेस दुई-चारवटा गाडी तेर्स्याएर तर्सिन्छ : रास्वपा सचेतक
सत्तारुढ राष्ट्रिय स्वतन्त्र पार्टीका सचेतक प्रकाशचन्द्र परियारले सत्यसँग डराउनेहरूले प्रेसमाथि आक्रमण गर्ने भन्दै मिडिया हाउसमा गाडी तेर्स्याएर गरिएको हर्कतको निन्दा गरेका छन् । उनले कसैको नाम भने लिएनन् । तर सरकारतर्फ नै सुई सोझ्याए । प्रतिनिधि सभाको बैठकमा विशेष समयमा बोल्दै सचेतक परियारले भने, हामी सत्तामा छौँ भन्दैमा,कसैका स्वार्थहरू ठोक्किँदैमा प्रेसमाथि हुने कुनै पनि शैलीको त्रासदी र अराजकताको साक्षी हुन नपरोस् । लोकतन्त्रको रक्षाका लागि स्वतन्त्र प्रेसको प्रतिरक्षा गर्न हामी अग्रसर नभए अरू को बोल्छ ?
बन्दूकसँग नडराएको नेपाली प्रेस दुई चारवटा गाडी तेर्स्याउँदैमा नडराउने समेत उनले बताए । परियारले रास्वपा पूर्ण प्रेस स्वतन्त्रताको पक्षमा र पत्रकारको रक्षाको पक्षमा रहेको बताए । उनले भने, हिजो राजधानीमा अग्रणी सञ्चार माध्यमका मुख्य प्रवेशद्वारमै गाडीहरू पार्किङ गरेर भौतिक रूपमा आवतजावत ठप्प पारी सञ्चार गृहलाई तर्साउने कुत्सित प्रयास गरियो, म यसको कडा शब्दमा भर्त्सना गर्दछु । सत्यसँग डराउनेहरूले मात्र यस्तो हर्कत गर्छन् । तर बुझ्नुपर्ने कुरा के हो भने सत्यलाई ढाकछोप गर्न खोज्नु भनेको हत्केलाले सूर्य छेक्नु जस्तै हो । उनले देशमा पत्रकारिताले ठूलो आँधीबेहरीको सामना गरेर आजको उचाइ हासिल गरेको स्मरण गरे ।
उनले थपे इतिहास साक्षी छ, हिजो निरङ्कुश शाहीकालमा तत्कालीन राजा ज्ञानेन्द्र शाहको सैनिक शासनमा बन्दूक बोकेका सेनाहरू समाचार कक्षभित्रै पसेर समाचार सेन्सर गर्थे । म त्यसको साक्षी छु । त्यतिबेला नझुकेको नेपाली सञ्चार माध्यम आज सडकमा दुईरचार ओटा गाडी तेर्स्याएर तर्सिन्छ होला र रु ओख्लीमा टाउको हालेपछि मुसलको के डर भने झैँ जस्तोसुकै सङ्कटमा पनि निर्भीक भएर उभिएको इतिहास कहाँ भुल्न सकिन्छ र ? सबै सञ्चार गृह र पत्रकारहरूको निर्बाध काम गर्न पाउने सुरक्षाको प्रत्याभूति दिनको लागि गृह प्रशासन र सरकारको गम्भीर ध्यानाकर्षण गराए ।
