अमेरिकी सेनामा कार्यरत नेपाली युवाको गोली लागेर निधन
अमेरिकी सेनामा कार्यरत एक युवाको गोली लागेर निधन भएको छ । तेह्रथुम जन्मस्थान भएका २४ वर्षिय सुशील थापाको दुई दिनअघि निधन भएको हो । अमेरिका निवासी समाजसेवी जोडी हेम थापा र माया थापाका कान्छा छोरा हुन् सुशील । उनी हालैमात्र अमेरिकाकी सेनामा पदोन्नति भएका थिए । थप तालिमका क्रममा दुर्घटनाबस चलेको गोली टाउकोमा लागेको पारिवारिक स्रोतले बताए पनि आधिकारिक पुष्टि भएको छैन । परिवारले शव प्राप्त नगरिसकेको र जागीरमा प्रमोसन भएकाहरूलाई नयाँ हतियार दिइएको रहेछ थापाले भने । त्यसको तालिमका क्रममा साथीको बन्दूकबाट चलेको गोली छोरोको कन्चटमा लागेको भन्ने जानकारी पाएका छौँ । अहिलेसम्म हामीलाई शव दिइएको छैन उनले भने ।
प्रमोसनपछि केही दिन बिदा लिएर सुशीलले परिवारसँग घूमघाम गरेका थिए । छुट्टी सकिएर फेरि जागीर सुरु गरेको केही दिनमा नै दर्दनाक घटना भएको हो । छोराको निधनपछि हिजो हेम थापाले फेसबुकमा दुईवटा स्टाटस लेख्दै सांकेतिकरूपमा बेदना पोखेका थिए । उनले लेखेका छन्, जीवनको सबैभन्दा दुखद घडी‘। मेरो जीबनमा नसोचेको भयो, मेरो र मेरा परीवारको खुसी शत्रुले मात्र हैन भगवानले सम्म देख्न सकेन्, कति मार्नुछ मार भगवान्‘ जिउँदो लास भएर बाचेकै हो, अझै बाँचुला, सहुँला । छोरोको कसैसित दुस्मनी थिएन, जानजान गोली हानिएको हो जस्तो लाग्दैन, घटनाको छानबिनपछि सत्यतथ्य बाहिर आउला, हेम थापाले थपे ।
कानूनी प्रक्रिया पूरा भएपछि एक(दुई दिनमा परिवारले शव प्राप्त गर्ने आशा गरिएको छ । हेम थापाको परिवार २२ वर्षअघि अमेरिका गएको हो । माओवादी जनयुद्धका बेला तीनपटक अपहरण परेका थापा भागेर इजरायल गएका थिए । त्यहाँ दुई वर्ष बिताएपछि अमेरिका गएका हुन् । अमेरिकामा शरणार्थीका रूपमा बसेका उनी उबर चलाउने गर्थे । उनकी पत्नी माया व्यवसाय गर्छिन् । थापा दम्पतीले अमेरिकामा कमाएको पैसाको ठूलो हिस्सा नेपालमा समाजसेवामा खर्च गर्ने गरेको छ । अहिलेसम्म २० करोडभन्दा बढी विभिन्न सेवामुलक कामका लागि नेपाल पठाइसकेको उनीहरूले बताउने गरेका छन् । थापा दम्पतीका दुई छोरा र एक छोरी छन् । जेठा छोरा सुनील र छोरी तुलसा डाक्टर हुन् । कान्छा छोरा सुशील भने अमेरिकी सेनामा जागीर खाइरहेका थिए ।
