सरकारविरुद्ध सडकमा जानुपर्ने हुनसक्छ : प्रचण्ड
नेपाली कम्युनिस्ट पार्टीका संयोजक पुष्पकमल दाहाल प्रचण्डले सरकारको क्रियाकलाप जनविरोध भएको बताएका छन् । पार्टी मुख्यालय पेरिसडाँडामा आयोजित कार्यक्रममा बोल्दै सरकारको नीति कार्यक्रम गरिब मजदुर किसानका विरुद्ध भएको बताए ।
उनले भने सरकार श्रमिक वर्ग विरोधी, गरिब मजदुर किसान विरोधी, अधिकार, ट्रेड युनियन अधिकार लगायतका अधिकार विरोधी क्रियाकलापका विरुद्ध हामीले सबै मोर्चाबाट आवाज उठाउनु पर्नेछ । क्रमशः हामी सदनबाट, सडकबाट अगाड बढ्ने कोसिस गरिरहेका छौँ । सदनमा सबै प्रतिपक्षीहरूलाई एक ठाउँमा केन्द्रित गरेर अगाडी जाने हाम्रो कोसिस छ । सडकमा पनि बिस्तारै यी विषयहरू जनतालाई लैजान जरुरी छ ।
उनले सरकारको कदमविरुद्ध बिस्तारै–बिस्तारै जनताले पनि बुझ्दै जाने स्थिति बनेको भन्दै आत्तिनु पर्ने कारण नभएको बताए । फेरि एकचोटी गणतन्त्रवादी र वामपन्थीहरू मिलेर अगाडी बढ्नुपर्ने आवश्यकता रहेको बताए । उनले भने, एमाले, कांग्रेस, मधेश केन्द्रित दलहरूसँग हाम्रो लगातार छलफल भइराखेको छ । स्वयं सत्तामा भएको पार्टीका नेताहरूसँग पनि विभिन्न रूपमा छलफलहरू कुराकानीहरू भइराखेको छ ।
