लुम्बिनीमा पनि उठ्यो एमाले नेतृत्व पुनर्गठनको माग
नेतृत्व पुनर्गठनको माग लुम्बिनीमा जोडतोडले उठेको छ । आम निर्वाचनमा पार्टी पराजयको कारण नेतृत्व परिवर्तनको माग बढ्दै जाँदा एमालेले हिजो बिहिवार कपिलवस्तुको चन्द्रौटामा प्रदेशस्तरीय समीक्षा कार्यक्रम राखेको थियो ।
कार्यक्रममा सहभागी अगुवा कार्यकर्ताहरुको धारणा नेतृत्व परिवर्तनको पक्षमा देखिएको छ । लुम्बिनी प्रदेशअन्तर्गत जिल्ला कमिटीका पदाधिकारी र केन्द्रीय सदस्य सहभागी कार्यक्रममा बोल्ने सबै जिल्ला अध्यक्षहरु पुनर्गठनको पक्षमा देखिएका छन् । जिल्ला अध्यक्ष मात्र होइन भेलामा सहभागी सबैले नेतृत्व पुनर्गठनको माग गर्नुभयो, सहभागी एक अध्यक्षले भने, कतिपय अलि नरम देखिए पनि पुनर्गठन नगरे पार्टी अस्तित्व जोगाउन नसकिनेमा सबैको मत देखिएको छ ।
नेतृत्व पुनर्गठनको मोडालिटीमा भने केही फरक मत आएको ती अध्यक्षले जानकारी दिए । कतिपय साथीले पार्टी अध्यक्ष केपी शर्मा ओली मात्र होइन, पदाधिकारीसमेत आवश्यकताअनुसार घटुवा वा नेतृत्व छाड्नुपरे पनि तयार हुनुपर्ने गरी कुरा उठाउनु भएको छ, उनले थपे । भेलामा सहभागी अधिकांशको धारणा पार्टी नेतृत्व परिवर्तनको पक्षमा देखिएको छ । एकाधले अध्यक्ष ओलीलाई मात्र दोषारोपण गरेर नहुने धारणा राखे पनि प्रायः सबैको मत मूल नेतृत्वमाथि नै केन्द्रित थियो ।
गत आम निर्वाचनमा लज्जास्पद पराजयको कारण पत्ता लगाएर सुधार गर्न नसके कम्युनिष्ट आन्दोलन विघटनतिर जाने अधिकांशको चिन्ता थियो । नीतिप्रधान हुनुपर्नेमा ब्यक्तिप्रधान बन्दै गएको भन्दै अधिकांशले चिन्ता प्रकट गरेका थिए । जनतासँगको सम्बन्ध टुट्नु,परिवर्तन, विकास र समृद्धिको आशा तुहिनु तथा पार्टीले समय सापेक्ष नीतिगत परिवर्तन गर्न नसक्नुले यो हविगत भएको हो – भेलाको निष्कर्ष थियो ।
पार्टी पुनर्गठनको बिषय उठेपछि एमालेले त्यस बिषयमा छलफल गर्न कार्यदल गठन गरेको छ । कार्यदलले सातै प्रदेशमा सुझाव संकलनपछि केन्द्रीय कमिटी बैठकबाट पार्टी पुनर्गठनको लागि बिशेष महाधिवेशन वा अन्य विकल्पमा छलफल गर्नेछ । चन्द्रौटा भेलाका सुझावहरु सकेपछि एमाले उपाध्यक्ष बिष्णु पौडेलले पार्टी भित्रको वहसले पार्टीलाई सहि निष्कर्षमा पुर्याउने र आन्तरिक एकतालाई थप मजबुत बनाउने बताएका छन् । सामाजिक सञ्जाल फेसबुकमार्फत पौडेलले लुम्बिनीको कम्युनिस्ट आन्दोलनले
पछिल्लो समय गम्भीर धक्का र पराजय बेहोरेको स्वीकार गर्दै त्यसबाट शिक्षा लिएर, आत्मसमीक्षा गर्दै र पार्टीलाई पुनर्गठित गरेर नेपाली कम्युनिस्ट आन्दोलनको विजययात्रा सुनिश्चित गर्नुपर्नेमा जोड दिएका छन् । कार्यक्रममा उपाध्यक्ष रामबहादुर थापा, विष्णु पौडेल, गोकर्ण विष्ट, महासचिव शंकर पोखरेल, सचिव छविलाल विश्वकर्मा, नेता प्रदीप ज्ञवालीसहितका प्रदेश कमिटीका पदाधिकारी, १२ वटै जिल्ला कमिटीका पदाधिकारी र लुम्बिनी प्रदेशबाट केन्द्रीय कमिटीमा रहेकाहरु यो समीक्षामा सहभागी भएका थिए ।
यो भेलामा अध्यक्ष ओलीले भर्चुअल सम्बोधन गर्दै नेतृत्वको विकल्प खोज्ने बेमौसमी बहसले पार्टीलाई कमजोर बनाउने दाबी गर्दै पार्टी एकतामा केन्द्रित हुन नेता–कार्यकर्तालाई निर्देशन दिए । उनले महाधिवेशनबाट निर्वाचित नेतृत्व महाधिवेशनबाटै बिदा हुने परम्परा रहेको उल्लेख गर्दै आफूले महाधिवेशनको निर्णयबाहेक अन्य कुनै परिस्थितिमा नेतृत्व नछाड्ने अडान दोहो¥याए ।
