विश्वप्रकाश र कृष्ण सिटौलाबीच वार्ता
नेपाली कांग्रेसका उपसभापति विश्वप्रकाश शर्मा र इतर पक्षका नेता कृष्णप्रसाद सिटौलाबीच भेटवार्ता भएको छ । आज झापा धुलाबारीमा दुई नेताहरूबीच भेट भएको कांग्रेस झापाका सचिव कृष्ण हुमागाईँले बताए। उनका अनुसार दुई नेताहरूबीच केही समय वान टु वान वार्ता भएको थियो । आन्तरिक समस्या समाधान कित्ताकाटबाट नभई वार्ता र संवादबाट पार्टीभित्र बलियो एकता कायम गर्न सकिनेमा नेताहरु एकमत रहेको उनले बताए ।
नेपाली प्रजातान्त्रिक आन्दोलनका योद्धा याम भण्डारीको निधनप्रति समवेदना प्रकट गर्न दुई नेता आज बिहान झापा पुगेका थिए । उनीहरू झापाकै हुन् । पार्टीभित्र आन्तरिक विवाद चर्किएर विभाजनको डिलमा पुगेको बेलामा दुई नेताबीच भएको भेटलाई अर्थपूर्ण रूपमा हेरिएको छ । विशेष महाधिवेशनबाट गगन थापा नेतृत्वमा आएपछि कांग्रेसमा विवाद चर्किएको छ । सिटौलासहित इतर पक्षका नेताहरू अझै पनि विशेष महाधिवेशनबाट आएको नेतृत्वलाई अस्वीकार गर्दै आइरहेका छन् ।
