एमालेको राष्ट्रिय कार्यशाला सुरु, ओलीले गरे उदघाटन
नेकपा एमालेको ‘सदस्यता नवीकरण तथा विस्तार उत्प्रेरणा’ सम्बन्धी दुईदिने राष्ट्रिय कार्यशाला काठमाडौंमा सुरु भएको छ । पार्टी अध्यक्ष केपी शर्मा ओलीले कार्यशाला उदघाटन गरेका छन् ।
२१ फागुनको प्रतिनिधि सभा निर्वाचनपछि ओली आज पहिलोपटक सार्वजनिक कार्यक्रममा देखिएका हुन् । उनले केन्द्रीय संगठन विभागले आयोजना गरेको राष्ट्रिय कार्यशालाको उदघाटन गमलामा रोपिएको बिरुवामा पानी हालेर गरे ।
प्रतिनिधिसभाको चुनावमा पराजित भएपछि ओली सार्वजनिक कार्यक्रममा सहभागी भएका थिएनन् । बालेन शाह नेतृत्वको सरकार गठनको भोलिपल्टै पक्राउ परे । रिहा भएपछि पत्थरी अपरेसन गरेर ओली घरमै आराम गरिरहेका थिए । पार्टीका सचिवालय बैठक र नेताहरूसँग संवादमा भने निरन्तर जोडिएका थिए ।
आजको कार्यक्रममा ओलीसहित पार्टीका पदाधिकारीहरू पनि सहभागी छन् । प्रधानमन्त्री वालेन्द्रले संसदको रोष्ट्रमबाट नेपाल-भारत सीमाबारे विवादित अभिव्यक्तिले राजनीति बहस गरमाएको बेला ओलीले के बोल्छन् भन्ने पनि चासो छ । एमालेको कार्यक्रमस्थलमा नेपालको चुच्चे नक्सा पनि राखिएको छ ।
