४३ हजार अमेरिकी डलर सहित एक युवक पक्राउ
काठमाडौंबाट रसुवा जाँदै गरेको बसमा एक युवकको साथबाट ४३ हजार अमेरिकी डलर फेला परेको छ । रसुवाको उत्तरगया गाउँपालिका–५, बेत्रावती बजारस्थित पासाङल्हामु सडकखण्डबाट प्रहरीले ती युवकलाई समातेको हो । पक्राउ पर्नेमा धादिङको गंगाजमुना गाउँपालिका–५, घर भएका ३७ वर्षीय सुशिल गुरुङ छन् ।
उनी बा.प्र.०१–००६ ख ९५१५ नम्बरको यात्रुवाहक बसमा चढेर टिमुरे जाँदै थिए । तर, विशेष सूचनामा आधारमा खटिएको प्रहरी टोलीले बस रोकेर चेकजाँच गर्दा उनको साथबाट डलर बरामद भएको हो । गुरुङलाई राजस्व अनुसन्धान विभाग पठाइएको प्रहरीले जनाएको छ ।
