बदनाम शेयर कारोबारी दीपेन्द्र अग्रवालको अर्को बदमासी, भोटेकोशी हेली रिसोर्टका सञ्चालक सुवास प्रधानलाई यसरी अप्ठेरोमा पारे

शेयर बजारका बदनाम खेलाडी दीपेन्द्र अग्रवाल चलिरहेको एउटा रिसोर्ट सञ्चालनमा प्रवेश गरेर भताभुङ्ग पार्न सक्रिय भएका छन् । उनकै योजनामा अहिले सिन्धुपाल्चोकस्थित भोटेकोशी हेली रिसोर्टका सञ्चालक सुवास प्रधान जिल्ला प्रहरी कार्यालय, कास्कीको हिरासतमा बैंकिङ कसुर मुद्दामा थुनामा परेका छन् । सशस्त्र प्रहरीका एआईजी वंशी दाहाल, पोखराका व्यवसायी चिनबहादुर रानाभाट (चिनु), सिन्धुपाल्चोकका स्थानीय व्यवसायी छिरिङ्ग शेर्पा र पूर्वप्रधानमन्त्री माधवकुमार नेपालका नातेदार समिर नेपालसहितको मिलेमतोमा प्रधान प्रहरी हिरासतमा लगिएका हुन् । उनी हिरासतमा पर्ने सम्पूर्ण खेल दीपेन्द्र अग्रवालको प्रवेशपछि भएको हो ।

आर्थिक रुपमा समस्याग्रस्त भएपछि रिसोर्टमा नयाँ लगानीकर्ता खोजियो र त्यसक्रममा आपराधिक क्रियाकलापका कारण चर्चामा आइरहने नेपाली कांग्रेसका नेता गणेश लामामार्फत दीपेन्द्र अग्रवाल रिसोर्ट व्यवस्थापनको सम्पर्कमा गएका थिए । उनी रिसोर्ट सञ्चालनका निम्ति इच्छुक भएपछि शेयर विक्रि गर्न चाहने पुराना लगानीकर्ताको प्रति शेयर ५५ रुपैयाँका दरले खरिद गर्ने सम्झौता गरेका थिए । उक्त कार्यको पहल सुवास प्रधानले गर्ने तत्कालीन सम्झौता थियो । ५५ रुपैयाँभन्दा घटी वा बढी भएमा त्यसको जिम्मेवार पनि सुवास नै हुने भनिएको थियो । यो सम्झौता २०८१ फागुन १९ गते भएको थियो । दीपेन्द्रले लगानी गरेबापत गणेश लामालाई दुबै पक्षले ५०–५० लाखका दरले एक करोड रुपैयाँ दिने सहमति भयो । यसअनुसार सुवासले आफ्नो नाममा रहेका शेयर धितो राखेर तीन करोड २० लाख रुपैयाँ निकाले । त्यसमध्ये २० लाख रुपैयाँ होटल व्यवस्थापनका लागि खर्च भयो । बाँकी रकम पुराना शेयर लगानीकर्ताबाट शेयर खरिदका निम्ति पेश्कीमा खर्च भयो ।

यसपछि रिसोर्टको स्थगित संरचना पुनः निर्माणलगायतका अन्य काम भयो । बन्द अवस्थाको रिसोर्ट पनि सञ्चालनमा आयो । दीपेन्द्रले गरेको सम्झौताअनुसार ५५ रुपैयाँका दरले शेयर किन्नेसँगै बैंकका पुराना साँवा र व्याज तिरिदिने, रिसोर्टका अधुरो काम सिध्याउन ६ करोड रुपैयाँ दिने भनिएको थियो । त्यसबापत सुवासले दीपेन्द्रलाई ३ लाख ९६ हजार कित्ता शेयर दिने सहमति भयो । तर, २०८२ असार ३० गते पुराना सञ्चालक चिनु र दीपेन्द्रको भेट भएपछि सम्पूर्ण शर्त उल्लंघन भयो । उनीहरुले गणेश लामालाई दिने भनिएको रकम नदिने, सुवासले एभरेजिङका नाममा दीपेन्द्रलाई निःशुल्क शेयर दिनुपर्ने, रिसोर्टमा सुवासले गरेको लगानी फिर्ता नदिनेजस्ता कागज चिनु र दीपेन्द्रले गरे । फलस्वरुप असार मसान्तभित्र बैंकको साँवा र व्याज नतिर्दा बैंकले कालोसूचीमा राख्ने र लिलामीको सूचना जारी गर्ने काम भयो । चिनुसँग मिलेर दीपेन्द्रले अगाडि सारेका शर्त सुवासले नमानेमा वंशी दाहालले प्रहरी, प्रशासनमार्फत सुवासलाई दुःख दिनेजस्ता धम्की पाउँदै गए । उनीहरुले सुवासलाई असार ३२ गते करकापमा पारेर विभिन्न कागजातमा सही गराएको आरोप सुवासका एक पारिवारिक सदस्यले बताएका छन् ।

यसबीच शेयर बजारमा गरेका कीर्ते तथा अन्य गैरकानुनी धन्दाका कारण दीपेन्द्र अग्रवाल पक्राउ परे । उनलाई प्रहरीको सिआईबीले २०८२ साउन ५ गते पहिलोपटक पक्राउ गरेको थियो । पक्राउ परेपछि उनले रिसोर्टप्रतिको कुनै पनि दायित्व पूरा गरेनन् । उल्टै सुवासले दीपेन्द्रलाई ग्यारेण्टी स्वरुप दिएका चेक दीपेन्द्रले फिर्ता गरेनन् । उल्टै सोही चेकलाई बाउन्स गरेर प्रहरीमा मुद्दा हाल्ने काम गरे । सुवासले दीपेन्द्रसँग एडभान्स लिने क्रममा लिएको ३ करोड २० लाखको कारोबारपछि कतिपय खालि र कतिपय लेखिएका चेकमा सही गराइएको थियो । दीपेन्द्रलाई शेयर कारोबारमा प्रहरी पक्राउ गरेपछि उनका कर्मचारीले सुवासलाई ती चेक फिर्ता गर्नुपर्नेमा उल्टै सोही चेकका नाममा सुवास र उनको परिवारलाई विभिन्न किसिमका धाकधम्की दिने काम भएको पारिवारिकस्रोतले जनाएको छ ।