विद्या भण्डारी र केपी ओलीबीच २ घण्टा लामो छलफल
नेकपा एमालेमा नेतृत्व परिवर्तन र पार्टी पुनर्गठनको अभियान चलिरहेका बेला पूर्वराष्ट्रपति विद्यादेवी भण्डारी र अध्यक्ष केपी शर्मा ओलीबीच आइतबार २ घण्टाभन्दा लामो छलफल भएको छ ।
गुण्डु पुगेकी भण्डारीले पत्थरीको शल्यक्रियापछि आराम गरिरहेका ओलीलाई निवासमै पुगेर स्वास्थ्य अवस्थाको बारेमा जानकारी लिएको बताइएको छ । भण्डारी ओली अस्पतालमै रहेका बेला पनि भेट्न गएकी थिइन् । एमालेमा सक्रिय हुन चाहे पनि ओलीका कारण सदस्यता स्थगनको अवस्थामा रहेका बेला भण्डारीले फेरि पनि एमालेको विकास र विस्तारमा आफ्नो क्षमता लगाउने घोषणा गर्दै आएकी छन् ।
एमालेमा पदाधिकारीहरुकै तहबाट ओलीलाई राजीनामा गराएर पार्टी पुनर्गठनको प्रयास भइरहेका बेला उनीहरुले भण्डारीसँग पनि पटकपटक छलफल गरेका छन् । आइतबार गुण्डुमा पछिल्लो अवस्थाका बारेमा पनि पूर्वराष्ट्रपति भण्डारी र पूर्वप्रधानमन्त्री ओलीबीच गम्भीर छलफल भएको बताइएको छ । एमालेमा भइरहेका पछिल्लो भेला तथा नेताहरुका अभियानको बारेमा पनि दुई नेताबीच समीक्षा भएको भण्डारीनिकट स्रोतले जनायो । पछिल्लो समय ओली र भण्डारीबीच चिसिएको सम्बन्धमा सुधार आएको बताइन्छ ।
ओलीले नेतृत्व छाड्ने अवस्थामा अहिलेका पदाधिकारीबाट कोही पनि विकल्प नरहेको भन्दै एकथरी नेताले अन्तरिम अवधिका लागि भने पनि विद्या भण्डारीको नेतृत्वमा पार्टीलाई पुनर्गठन गर्नुपर्ने बताउँदै आएका छन् । भण्डारी पनि एकपटक एमालेको नेतृत्व लिन इच्छुक छन् । तर त्यसका लागि ओलीकै प्रस्ताव र समर्थन आवश्यक रहेको महसुस गरेरै उनले ओलीसँगको भेट र छलफल बाक्लो बनाएको अनुमान छ ।
