सरकारले सुकुम्वासी बस्तीमा डोजर आतङ्क मच्चायो : सूर्य थापा
नेकपा (एमाले)का नेता सूर्य थापाले सुकुम्वासी व्यवस्थापनका नाममा भइरहेको सरकारी कदमप्रति तीव्र असन्तुष्टि व्यक्त गर्नुभएको छ । उहाँले वर्तमान सरकारको कार्यशैलीलाई जनविरोधी भएको आरोप लगाउँदै डोजर प्रयोगमार्फत बस्ती हटाउने कार्यलाई ‘आतङ्क’ को संज्ञा दिनुभएको छ ।
उहाँले सामाजिक सञ्जालमार्फत धारणा सार्वजनिक गर्दै सुकुम्वासी बस्तीकाे डाेजर आक्रमणलाई विगतका ऐतिहासिक आक्रमणसँग तुलना गर्नुभएको छ । उहाँका अनुसार सुकुम्वासी बस्तीमा डोजर चलाएर उठिबास गराउने कार्यले राज्यको जिम्मेवारीभन्दा बाहिर गएर अन्यायपूर्ण अभ्यासलाई प्रोत्साहन गरेको देखिन्छ ।
उहाँले सरकारमाथि धार्मिक तथा सांस्कृतिक संरचनामाथि समेत निशाना साधिएको आरोप लगाउँदै यस्तो प्रवृत्तिले सामाजिक सद्भावमा असर पार्न सक्ने उल्लेख गर्नुभएको छ । ‘उहिले समसुद्दिन र गयासुद्दिनले मन्दिर र बिहारमा आक्रमण गरेका थिए, अहिले बालेले गरिरहेको देखिएको छ ! सुकुम्वासी बस्तीमा डोजर आतङ्क चलाएर उठिबास लगाउने जनविरोधी, पापी र दुष्ट कठपुतली सरकारले बिहार र मन्दिरमाथि समेत निशाना साँधेको छ’ उहाँले फेसबुकमा लेख्नु भएको छ ।
साथै, सार्वजनिक रूपमा अतिक्रमणकारी भनिएका केही सांसदहरूका घर तथा कार्यालय भने जोगिएको दाबी गर्दै कार्यान्वयनमा विभेद भएको उहाँको टिप्पणी छ । कैलालीका क्षेत्रप्रसाद (केपी) खनाल, बुटवलका सागर ढकाल, शंखमूलका भरत पराजुली, हेटौँडाका प्रशान्त उप्रेती र दाङकी खिमा विकलगायत व्यक्तिहरूको संरचना सुरक्षित राखिएको प्रति उहाँले प्रश्न गर्नु भएको छ। यसले सरकारको नीतिमा समानता र निष्पक्षता नभएको उहाँकाे धारणा छ । किनभने, यी सबै घण्टी छाप- चुपचाप सुरक्षित गरिएकोमा बधाई छ ! नयाँको शासन यस्तो हुनुपर्छ र छिटोभन्दा छिटो जनआक्रोश चुलिएर बिदाइ हुनुपर्छ’ थापाको भनाइ छ ।
