सरकारले लोकतन्त्रको खिलाफमा कदम चाल्यो : प्रचण्ड
नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले बोलाइसकेको संसद् रोकेर अध्यादेश ल्याउने सरकारको कदम लोकतन्त्रको खिलाफमा भएको बताएका छन् । रुकुम पश्चिमको मुसिकोटमा आयोजित पत्रकार सम्मेलनमा बोल्दै दाहालले सदनलाई छलेर अध्यादेश ल्याउने असहज भएको बताए ।
उनले भने, बोलाइसकेको सदनको अधिवेशनलाई रोकेर अध्यादेश ल्याउनु लोकतन्त्रका विरुद्ध छ, संवैधानिक मान्यताका पनि विरुद्ध छ । यस्तो गल्ती नगर्न हामीले सरकारलाई सावधान पनि गराएका छौँ । उनले अध्यादेश अब राष्ट्रपतिकहाँ पुगिसकेकाले के हुन्छ हेर्न बाँकी रहेको भन्दै अलोकतान्त्रिक विधि अपनाउने कुराले संविधानको मर्ममाथि प्रहार गर्ने टिप्पणी गरे ।
उनले भने, देशैभरि ५०औँ वर्षदेखि बसेका ठाउँहरूबाट पनि वैकल्पिक व्यवस्था नगरी, वास्तविक सुकुमबासी हो होइन भन्ने कुराको पनि निधो नगरीकन बल प्रयोगको तरिकाद्वारा डोजर लगाइयो । गरिब निमुखाहरूलाई आहत हुने किसिमले काम सरकारले गरेको छ, यो विल्कुल गलत छ ।
उनले वास्तविक सुकुमबासीको यथार्थ स्थिति छानबिन गरेर वैकल्पिक व्यवस्थापछि समझदारीले हटाउनुपर्ने ठाउँमा सरकारले बल प्रयोग गरेको भन्दै असन्तुष्टि जनाए ।
