पूर्णबहादुरलाई कारबाही गर्ने गगनको तयारी
पार्टीको समानान्तर गतिविधिमा सक्रिय रहेको आरोपमा कांग्रेसले पूर्वकार्यवाहक सभापति पूर्णबहादुर खड्कालाई कारबाहीको तयारी गरेको छ । खड्काले ‘कावा सभापति’कै हैसियतमा दोस्रोपटक वक्तव्य जारी गरेपछि कांग्रेस कारबाहीको तयारीमा लागेको हो ।
आज कांग्रेसको केन्द्रीय कार्यसम्पादन समितिको बैठक २ बजे बस्दैछ । त्यसअघि ११ बजे केन्द्रीय अनुशासन समितिको बैठक बोलाइएको छ । यसअघि पूर्वगृहमन्त्री रमेश लेखक पक्राउविरुद्ध खड्काले कांग्रेसको लेटरप्याडमा विज्ञप्ति निकालेपछि अनुशासन समितिले सचेत गराउने निर्णय गरेको थियो ।
केन्द्रीय अनुशासन समितिको चैत १८ गतेको बैठकले खड्काको नाम उल्लेख नगरी अब उप्रान्त लेटरहेड दुरुपयोग भए नेपाली कांग्रेसको विधान,२०१७ (संशोधनसहित) र प्रचलित नेपाल कानूनबमोजिम कारबाही प्रक्रिया अगाडि बढाउने निर्णय गरेको थियो ।
अनुशासन समितिका संयोजक एवम् कांग्रेस केन्द्रीय सदस्य तारामान गुरुङले पार्टी अनुशासन नमान्ने जोकोही कारबाहीको दायरामा पर्ने बताए । पूर्णबहादुर खड्कालाई कारबाही गर्न अनुशासन समितिको बैठक बोलाउनुभएको हो भन्ने प्रश्नमा संयोजक गुरुङले गल्ती गर्ने कोही संरक्षित नहुने बताए ।
बैठकमा सबै कुरा केलाउने भन्दै उनले भने, पार्टीमा सबै अनुशासनमा बस्नुपर्छ । अनुशासन नमान्ने हो, विधानभन्दा दायाँबायाँ गर्ने हो भने त कारबाही भइहाल्छ नि । सभापति गगनकुमार थापाले पनि खड्कामाथि कारबाहीको संकेत गरेका छन् । मंगलबारदेखि सुरू जरा अभियानमा उनले अब धेरै नसहने बताएका छन् । म सभापतिको हैसियतले भन्दैछु, मलाई सहयोग गर्नुहोला ।
सहयोग गर्न नसक्नेले डिस्टर्व नगर्नुहोला । पार्टी कार्यालयबाहिरबाट हुने अनधिकृत गतिविधिको सीमा नाघ्ने हो भने सहने कुरा हुँदैन, थापाले भने । खड्काले निर्वाचन आयोगको निर्णयमा समर्थन नभएकाले चौधौँ महाधिवेशनबाट निर्वाचित केन्द्रीय समितिको कार्यवाहक सभापतिका रूपमा आफू कायमै रहेको बताएका छन् ।
