वाणिज्य बैंकहरुको नाफामा बृद्धि
चालु आर्थिक बर्षको फागुन मसान्तसम्ममा वाणिज्य बैंकहरुले ४३ अर्ब ८८ करोड नाफा आर्जन गरेका छन् । बाणिज्य बैंकहरुले अघिल्लो आर्थिक बर्षको सोही अबधिमा भन्दा ० दशमलव ८९ प्रतिशत बढी नाफा आर्जन गरेका हुन् । अघिल्लो वर्षको फागुनसम्म बैंकहरूले ४३ अर्ब ४९ करोड नाफा कमाएका थिए ।
नाफा कमाउने बैंकहरुमा सबैभन्दा अगाडि नबिल बैंक रहेको छ । गत वर्ष सोही अवधिमा ४ अर्ब नाफा कमाएको नविल बैंकले यो अवधिमा कुल ६ अर्ब ७ करोड नाफा कमाएको छ । चालु आर्थिक वर्षको फागुन मसान्तसम्ममा कुमारी बैंकले आफ्नो नाफामा २७४.६५ प्रतिशत बढाएको छ । उसले ३ अर्ब ६३ करोड नाफा कमाएको छ । यसैगरी यो अवधिमा सिद्धार्थ बैंकले ६८.३१ प्रतिशत, कृषि विकास बैंकले ६५.५६ प्रतिशत, राष्ट्रिय बाणिज्य बैंकले ३५.६८ प्रतिशत, सानिमा बैंकले २३.२१ प्रतिशतले नाफा बढाएका छन् ।
२० वटा वाणिज्य बैंकहरुमध्ये ९ वटा बैंकको नाफामा गिरावट आएको छ। लक्ष्मी सनराइज बैंकको नाफामा ६७.३६ प्रतिशत, एनआइसी एशिया बैंकको ६२.४१ प्रतिशत, नेपाल बैंकको ६०.२८ प्रतिशतले गिरावट आएको छ । नेपाल इन्भेष्टमेन्ट मेगा बैंक, स्ट्याण्डर्ड चार्टर्ड, प्रभु, हिमालयन र सिटिजन्स बैंकको नाफामा पनि गिरावट देखिएको छ ।
