सच्याउन नसके कम्युनिष्ट आन्दोलन समाप्त हुन्छ : गोकुल बास्कोटा
नेकपा (एमाले)का नेता गोकुल प्रसाद बास्कोटाले नेपालका कम्युनिष्टहरु अब सच्चिएर अघि बढ्नु पर्ने बताउनुभएको छ । पाँच वर्षअघि आफूले नेकपाको ‘क्लाइमेक्स र कोल्याप्स’को समय आएको चेतावनी दिएको स्मरण गराउँदै उहाँले अहिले त्यही अवस्था आएको उल्लेख गर्नु भएको छ । उहाँले तत्कालीन नेपाल कम्युनिष्ट पार्टी (नेकपा) गठन हुँदा वाम शक्तिहरू एकीकृत भएसँगै जनतामा अभूतपूर्व उत्साह देखिएको उल्लेख गर्दै विचार, संगठन र व्यवहार दुई नेताको अधीनमा सीमित भएकाले एकताको आधार कमजोर बनेको बताउनुभएको छ ।
उहाँले अन्तर्राष्ट्रिय कम्युनिष्ट आन्दोलनका अनुभवबाट पनि पर्याप्त पाठ नसिकिएको टिप्पणी गर्नुभएको छ । सोभियत संघबाट आवश्यक पाठ ग्रहण नगरेको र चिनियाँ मोडेलको नक्कल गर्ने प्रयास समेत सफल हुन नसकेको उहाँको धारणा छ ।
बास्कोटाले अहिलेको कम्युनिष्ट आन्दोलन पूर्ण रूपमा समाप्त नभएको तर समयमै सच्याउन नसके भविष्यमा पुनः गम्भीर सङ्कटमा पर्न सक्ने चेतावनी दिनुभएको छ । उहाँले विचार, संगठन र व्यवहारलाई सुदृढ बनाउँदै आन्दोलनलाई सही दिशामा अघि बढाउन आवश्यक रहेको पनि बताउनुभएको छ । ‘सक्किएको त छैन, नसच्याए अर्को पल्ट सकिन्छ’, उहाँको भनाइ छ ।
