राष्ट्रिय स्वाधीनता खतरामा छ : वर्षमान पुन
नेपाली कम्युनिस्ट पार्टी नेता वर्षमान पुनले यतिबेला राष्ट्रिय स्वाधीनता संकटमा रहेको बताएका छन् ।फागुन २१ मा हुने प्रतिनिधिसभा सदस्य निर्वाचनमा आफ्नो दलले राष्ट्रिय स्वाधीनता रक्षा, सुशासन, समृद्धि र रोजगारीका मुद्दालाई प्रमुख एजेण्डाका रूपमा अघि सारेको बताए ।
एक भिडियो सन्देश जारी गर्दै पुनले मुलुकले सुशासन र समृद्धि खोजिरहेको तथा युवाहरूलाई रोजगारी आवश्यक रहेको बताएका छन् । मतदान गर्नुअघि राष्ट्रको स्वाधीनता र भविष्य, युवाको भविष्य, शहीदहरूको बलिदान र ऐतिहासिक सङ्घर्षहरूलाई स्मरण गर्न अपिल गरेका छन् ।
पार्टीले विगतमा सुशासन, समृद्धि र सामाजिक न्यायका क्षेत्रमा काम गरेको दाबी गर्दै उनले महिला, मजदुर, किसान, दलित, जनजाति, मधेसी तथा कर्णालीजस्ता पिछडिएका क्षेत्रका समुदायलाई राज्यको मूलधारमा ल्याउन आफूहरुले भूमिका खेलेको बताए ।
‘देश निर्वाचनमा होमिएको छ । राष्ट्रिय स्वाधीनमा संकटमा छ । देशले सुशासन खोजेको छ, समृद्धि खोजेको छ । युवाहरूलाई रोजगारी आवश्यक छ ।
राष्ट्रिय स्वाधीनताकाको रक्षा, सुशासन र देशको समृद्धिका लागि विगतदेखि काम गर्दै आएको नेपाली कम्युनिस्ट पार्टी र यसका उम्मेदवारहरूलाई आगामी निर्वाचनमा तारा चिन्हमा मतदान गरी विजयी गराई आम नेपाली जनताले युवाहरूले आफ्नो राष्ट्रभक्ति, देशभक्ति, स्वाधीनता र सुशासनको प्रतिबद्धतालाई व्यक्त गर्नुपर्ने छ’, पुनले भनेका छन् । पार्टी र नेताहरू कमजोरीरहित नभए पनि विगतका सीमाहरू सच्याउँदै पुनः जनताको सेवामा समर्पित हुने उनको भनाइ छ ।
संविधान र कानुनमार्फत सम्पत्तिमा महिलाको अधिकार, राजनीतिक सहभागिता र उत्पीडित समुदायको प्रतिनिधित्व सुनिश्चित गर्ने पहल गरिएको उल्लेख गरे । हाल करिब ३० प्रतिशत महिलाहरू सम्पत्तिको मालिक बनेको र एकतिहाइ महिला राजनीतिक तथा सार्वजनिक क्षेत्रमा स्थापित भएको दाबी उनले गरे ।
