एमालेको घोषणापत्रमा स्वतन्त्रता, स्वाभिमान, राष्ट्रियता, विकास र सुशासन आउँछ : ईश्वर पोखरेल
नेकपा (एमाले) का नेता तथा काठमाडौं क्षेत्र नं ५ का प्रतिनिधिसभा सदस्य उम्मेदवार ईश्वर पोखरेलले एमाले स्वतन्त्रता, स्वाभिमान, राष्ट्रियता, विकास र सुशासनको सवालमा दृढ प्रतिबद्ध रहेको बताएका छन् ।
प्रेस चौतारी नेपालले आज आयोजना गरेको ‘उम्मेदवारसँग पत्रकार सम्मेलन’मा बोल्दै उनले एमालेको आगामी घोषणापत्रमा पनि यी मूल विषयहरू प्राथमिकताका साथ समेटिने स्पष्ट पारेका हुन् । नेकपा एमाले स्वतन्त्रता, स्वाभिमान, राष्ट्रियता, विकास र सुशासनको सवालमा प्रतिबद्ध छ, उनले भने, एमालेको घोषणापत्रमा पनि यिनै कुरा आउनेछन् ।
नेता पोखरेलले वर्तमान व्यवस्थासँग गाँसिएका केही पक्षमा सुधार आवश्यक रहेको उल्लेख गर्दै संविधान संशोधनमार्फत ती विषयहरूलाई परिमार्जन गर्दै अघि बढ्ने धारणा व्यक्त गरे । उनका अनुसार शासकीय स्वरूप, निर्वाचन प्रणाली, सेवा प्रवाहलगायतका क्षेत्रमा सुधार गर्नुपर्ने आवश्यकता देखिएको छ । कतिपय सवालमा सुधार गर्नुपर्ने छ, त्यसमा हामी लाग्छौँ, उनले भने ।
यस पटक एमालेको घोषणापत्र अघिल्लाभन्दा पृथक हुने उल्लेख गर्दै उनले पार्टी निश्चित मुद्दामा समय तालिकासहित प्रस्तुत हुने जानकारी दिए । यस पटकको एमालेको घोषणापत्र पृथक हुनेछ, उनले भने, हामी निश्चित मुद्दामा समय तालिकासहित प्रस्तुत हुन्छौँ ।
नेता पोखरेलले आगामी निर्वाचनमा एमालेले राम्रो परिणाम ल्याउने विश्वास व्यक्त गर्दै जनतासमक्ष त्यसलाई प्रमाणित गरेर देखाउने दाबी गरेका छन् । निर्वाचनमा यस पटक हामी राम्रो परिणाम ल्याउँछौँ र तपाईँहरूलाई सुनाउँछौँ, उनले भने ।
एमालेलाई कमजोर पार्न विभिन्न प्रकारका षड्यन्त्र हुँदै आएको आरोप लगाउँदै उनले बाहिरी षड्यन्त्रलाई चिर्न पार्टी भित्री रूपमा बलियो हुनुपर्ने आवश्यकता औँल्याए । एमालेलाई सिद्ध्याउन हरेक खालका षड्यन्त्र हुने गरेका छन्,” उनले भने, बाहिरी षड्यन्त्रलाई चिर्न भित्री रूपमा बलियो हुनुपर्छ ।
नेता पोखरेलले एमाले मजबुत भएर अगाडि बढ्ने र कुनै पनि षड्यन्त्र सफल हुन नदिने प्रतिबद्धता व्यक्त गरे ।
