बागबजार र ववरमहलमा बक्स कल्भर्ट निर्माण हुने
काठमाडौँ महानगरपालिकाले पुतलीसडकबाट बागबजार हुँदै रत्नपार्क जाने सडक खण्डको टुकुचा खोलामा बक्स कल्भर्ट निर्माण गर्ने भएको छ । यसको लागत ५७ लाख ७२ हजार ६९४ रुपियाँ हो । यस योजनाको लागत अनुमान ७० लाख ७२ हजार १८२ रुपियाँ थियो । कल्भर्ट निर्माणको काम आउँदो चैत मसान्तभित्र सम्पन्न गर्ने गरी निर्माण पक्षसँग सम्झौता भएको छ । यो कल्भर्ट सडकतर्फ ५ मिटर र पानी वहाव हुनेतर्फ १४ मिटरको हुनेछ ।
अहिले त्यहाँ पानीको निकासका लागि ह्युम पाइप राखिएको छ । यसरी राखिएका ह्युम पाइप पुराना भइसकेका छन् ।’ सार्वजनिक निर्माण विभागका सबइञ्जिनियर दिपकबहादुर शाही भन्नुहुन्छ, ‘बर्खाको समयमा पानीका वहाव रोकिने अवस्था भएको छ । यसको सम्भावित डुवान र कटानको जोखिम घटाउन बक्स कल्भर्ट निर्माण गर्न लागिएको हो ।’ कल्भर्ट निर्माणको काम प्रारम्भ भएपछि सडकको आवागमन पूर्ण बन्द हुनेछ ।
डिल्लीबजार पुतलीसडक चोक हुँदै बागबजारतर्फ जाने र रामशाह पथ हुँदै पुतलीसडक पुगेर बायाँ मोडिएर बागबजार जाने सवारी साधनका लागि वैकल्पिक मार्गको व्यवस्थापन गर्न ट्राफिक प्रहरी कार्यालयसँग समन्वय गरिएको शाहीको भनाइ छ । यसका लागि दुवैतर्फबाट आउने सवारी साधनहरु कमलादी मोडमा पुगेर बायाँ मोडिँदै कमलादी गणेश मन्दिर, घण्टाघरतर्फको सडक उपयुक्त वैकल्पिक मार्ग बन्न सक्छ । काम थालिएपछि यो सडक खण्ड २ महिना बन्द रहनेछ । यससँगै धोवीखोला नदी खण्डको दोभान नपुग्दै रोजबर्ड स्कूल नजिक पनि बक्स कल्भर्ट निर्माण हुँदैछ ।
यसको लागत २ करोड २१ लाख २३ हजार ८९९ रुपियाँ हो । यसको लागत अनुमान ३ करोड ७१ लाख २३ हजार ९३५ रुपियाँ थियो । यो काम २०८३ पुस मसान्तभित्र सम्पन्न गर्ने गरी निर्माण पक्षसँग सम्झौता भएको छ । यो कल्भर्टको लम्बाइ १७ मिटर र चौडाइ ७ मिटरको हुनेछ । यस ठाउँमा भएको फलामे पुल २०८० सालको धोवीखोलाको बाढील जगसहित क्षति ग¥यो । वडा नं. ११ का अध्यक्ष हीराला तण्डुकार भन्नुहुन्छ, ‘पुल बनाउने भनेर विभिन्न निकाय आए । हामीलाई बनाउनु थियो ।
कसैले बनाउँछु भन्यो भने नबनाउनु किन भन्नु भनेर हुन्छ भन्यौँ । तर, कसैले बनाएनन् । त्यसपछि वडाले निर्माण योजना बनाउँदै थियो, महानगरपालिकाको केन्द्रीय बजेटबाट बनाउन सकिने भनेपछि त्यही प्रक्रियाबाट निर्माण हुन लागेको हो ।’ वडाध्यक्ष तण्डुकारले जानकारी दिनुभयो ।
