एमालेका उम्मेदवारलाई जिताउन एकजुट बनौं : योगेश भट्टराई
नेकपा एमालेका उपमहासचिव योगेश भट्टराईले पार्टीभित्रको उम्मेदवार बन्ने विषय माघ ६ गतेभन्दा अघि नै सकिएको भन्दै अब एकढिक्का भएर सूर्य ध्वजाबाहक उम्मेदवार जिताउनुको विकल्प नरहेको बताएका छन् ।
सुनसरीमा पत्रकारसँग कुरा गर्दै भट्टराईले अब अरु पार्टीसँगको प्रतिस्पर्धामा एमालेका उम्मेदवार उत्रिसकेकाले को हुँदा ठिक भन्ने बहस सकिएको बताए ।
उपमहासचिव भट्टराईले भने-अब हामी अरु पार्टीसँगको प्रतिस्पर्धामा उत्रिसक्यौँ, टिकट वितरणको समीक्षा अब अहिले हुँदैन । अब हामीले देशैभर अन्तरिक एकता बलियो बनाउनुपर्छ ।
आफ्नो तर्फबाट उम्मेदवार बनेका कमरेडहरूको पक्षमा एकढिक्का भएर जानुपर्छ । देशभरीको पार्टी पंक्तिलाई मेरो अपिल छ, आजको लडाइँ एमालेभित्र कुन उम्मेदवार भयो भन्ने होइन, एमाले जित्नुपर्छ भन्ने हो ।
भट्टराईले एमालेका लागि सधैँ चुनाव चुनौतीपूर्ण नै रहेकाले यसपटकमात्र चुनौती नभएको बताए । उनले अब उम्मेदवारको बारेमा समीक्षा फागुन २१ पछिमात्र हुने भन्दै एमालेको नेतृत्वमा सरकार गठन गर्नेगरी चुनाव जिताउन लाग्ने बताए ।
